പത്തനംതിട്ട: 13 വയസുകാരി സഹപാഠികളിൽ നിന്ന് ലൈംഗികാതിക്രമത്തിന് ഇരയായെന്ന പരാതിയിൽ അഞ്ച് വിദ്യാർഥികൾക്കെതിരെ പൊലീസ് പോക്സോ നിയമപ്രകാരം കേസെടുത്തു. സംഭവത്തിൽ വിശദമായ അന്വേഷണം ആരംഭിച്ചതായി പൊലീസ് അറിയിച്ചു.
സ്കൂളിലെ ഒൻപതാം ക്ലാസ് വിദ്യാർഥിനിയായ കുട്ടിയുടെ പെരുമാറ്റത്തിൽ അസ്വാഭാവിക മാറ്റങ്ങൾ ശ്രദ്ധയിൽപ്പെട്ടതിനെ തുടർന്ന് നടത്തിയ കൗൺസിലിംഗിനിടെയാണ് ലൈംഗികാതിക്രമ വിവരം പുറത്തുവന്നത്. തുടർന്ന് സ്കൂൾ അധികൃതർ വിവരം ബന്ധപ്പെട്ട അധികാരികളെ അറിയിക്കുകയായിരുന്നു. കുട്ടിയുടെ മൊഴിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തത്. പത്തനംതിട്ട കൂടൽ പൊലീസ് സ്റ്റേഷൻ പരിധിയിലാണ് സംഭവം.
11 പ്രതികളിൽ 6 പേരും പ്രായപൂർത്തിയാകാത്തവരാണ്. പ്രതികളിൽ ഒരാൾ പെൺകുട്ടിയാണ്. ഈ കുട്ടിയുടെ വീട്ടിൽ വച്ചും പീഡനം നടന്നിരുന്നു. പുറത്തു നിന്നുള്ളവരും പീഡിപ്പിച്ചെന്ന് പെൺകുട്ടിയുടെ മൊഴി നൽകിയിട്ടുണ്ട്. പ്രതികളിൽ ചിലർ പ്രായപൂർത്തിയാകാത്തവരായതിനാൽ ജുവനൈൽ ജസ്റ്റിസ് നിയമപ്രകാരമുള്ള നടപടികളാണ് സ്വീകരിക്കുക. കുട്ടിയുടെ മൊഴി, ഡിജിറ്റൽ തെളിവുകൾ, മറ്റ് സാഹചര്യ തെളിവുകൾ എന്നിവ ശേഖരിച്ച് അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
സംഭവവുമായി ബന്ധപ്പെട്ട് കൂടുതൽ പേരുടെ പങ്ക് ഉണ്ടോയെന്നും മറ്റ് സാഹചര്യങ്ങൾ നിലവിലുണ്ടോയെന്നും അന്വേഷണസംഘം പരിശോധിക്കുന്നുണ്ട്. ഇരയായ കുട്ടിക്ക് ആവശ്യമായ കൗൺസിലിംഗും മാനസിക പിന്തുണയും ഉറപ്പാക്കാനുള്ള നടപടികളും സ്വീകരിച്ചിട്ടുണ്ടെന്ന് അധികൃതർ അറിയിച്ചു