തൃശൂർ: നെടുപുഴയിൽ കോൾപാടത്ത് വള്ളം മറിഞ്ഞ് കാണാതായ രണ്ടുപേരുടെയും മൃതദേഹങ്ങൾ കണ്ടെടുത്തു. കല്ലൂർ സ്വദേശിയുടെയും അദ്ദേഹത്തിന്റെ സുഹൃത്തിന്റെയും മൃതദേഹങ്ങളാണ് ഇന്ന് രാവിലെ നടത്തിയ വിപുലമായ തെരച്ചിലിൽ അഗ്നിശമനസേന കണ്ടെത്തിയത്.
കഴിഞ്ഞ ദിവസം കോൾപാടത്ത് വളർത്തു മീനുകൾക്ക് തീറ്റ നൽകാനായി പോയ അഞ്ചംഗ സംഘമാണ് അപകടത്തിൽപ്പെട്ടത്. പാടത്തിന് നടുവിലേക്ക് എത്തിയതോടെ ഇവർ സഞ്ചരിച്ചിരുന്ന വള്ളം പെട്ടെന്ന് മുങ്ങുകയായിരുന്നു. വള്ളത്തിലുണ്ടായിരുന്ന മൂന്ന് പേർ ഉടനടി നീന്തി രക്ഷപ്പെട്ടെങ്കിലും, ബാക്കി രണ്ടുപേർ വെള്ളത്തിൽ താണുപോവുകയായിരുന്നു.
അപകടവിവരമറിഞ്ഞ് ഉടൻ തന്നെ ഫയർഫോഴ്സ് സംഘം സ്ഥലത്തെത്തി തെരച്ചിൽ ആരംഭിച്ചിരുന്നു. എന്നാൽ പ്രദേശത്ത് പെയ്ത ശക്തമായ മഴയും മോശം വെളിച്ചവും കാരണം ഇന്നലെ രാത്രിയോടെ തെരച്ചിൽ താൽക്കാലികമായി നിർത്തിവെക്കേണ്ടി വന്നു. തുടർന്ന് ഇന്ന് രാവിലെ വീണ്ടും ആരംഭിച്ച തെരച്ചിലിലാണ് കാണാതായ രണ്ടുപേരുടെയും മൃതദേഹങ്ങൾ കണ്ടെത്താനായത്.
