ന്യൂഡൽഹി: സിനിമയുടെ വ്യാജ പതിപ്പുകൾ വ്യാപകമായി പ്രചരിപ്പിക്കുന്നതിനെതിരെ മെസേജിങ് പ്ലാറ്റ്ഫോമായ ടെലഗ്രാമിന് കേന്ദ്ര സർക്കാർ നോട്ടീസ് നൽകി. 15 ദിവസത്തിനകം സ്വീകരിച്ച നടപടികളുടെ വിശദാംശങ്ങൾ ഉൾപ്പെട്ട ആക്ഷൻ ടേക്കൺ റിപ്പോർട്ട് സമർപ്പിക്കാനാണ് കേന്ദ്ര വാർത്താ-പ്രക്ഷേപണ മന്ത്രാലയം നിർദേശിച്ചിരിക്കുന്നത്.
വ്യാജ പതിപ്പുകൾ തടയാൻ ഓരോ ലിങ്കുകളും പ്രത്യേകം നീക്കം ചെയ്യുന്നതിന് പകരം, പ്ലാറ്റ്ഫോം തലത്തിൽ തന്നെ ഫലപ്രദമായ നിയന്ത്രണ സംവിധാനം ഒരുക്കണമെന്നാണ് കേന്ദ്രത്തിന്റെ നിർദേശം. പകർപ്പവകാശം ലംഘിച്ച് ഉള്ളടക്കം പ്രചരിപ്പിക്കുന്ന ചാനലുകൾ, ഗ്രൂപ്പുകൾ, ബോട്ടുകൾ, അക്കൗണ്ടുകൾ, അഡ്മിന്മാർ എന്നിവർക്കെതിരെ കർശന നടപടി സ്വീകരിക്കണമെന്നും മന്ത്രാലയം ആവശ്യപ്പെട്ടിട്ടുണ്ട്.
നിശ്ചിത സമയപരിധിക്കുള്ളിൽ തൃപ്തികരമായ നടപടി സ്വീകരിക്കാത്ത പക്ഷം നിലവിലുള്ള നിയമപ്രകാരം തുടർനടപടികൾ നേരിടേണ്ടിവരുമെന്നും സർക്കാർ മുന്നറിയിപ്പ് നൽകിയിട്ടുണ്ട്. പൈറസിക്കെതിരായ പോരാട്ടത്തിൽ പ്ലാറ്റ്ഫോം ഉത്തരവാദിത്തം ഉറപ്പാക്കുന്ന കേന്ദ്രത്തിന്റെ പുതിയ സമീപനത്തിന്റെ ഭാഗമായാണ് ഈ നടപടിയെന്നാണ് സർക്കാർ വൃത്തങ്ങൾ വ്യക്തമാക്കുന്നത്
