തിരുവനന്തപുരം: പൊന്മുടിയില് കെഎസ്ആര്ടിസി ബസ് ബ്രേക്ക് നഷ്ടപ്പെട്ട് അപകടത്തില്പ്പെട്ടെങ്കിലും ഡ്രൈവറുടെ സമയോചിതമായ ഇടപെടലിലൂടെ വന് ദുരന്തം ഒഴിവായി. പൊന്മുടിയിലെ ആറാം വളവില് ശനിയാഴ്ചയാണ് സംഭവം. പൊന്മുടിയില് നിന്ന് തിരുവനന്തപുരത്തേക്ക് വരികയായിരുന്ന കെഎസ്ആര്ടിസി ബസിനാണ് യാത്രാമധ്യേ ബ്രേക്ക് നഷ്ടമായത്. നിയന്ത്രണം നഷ്ടപ്പെട്ടതായി മനസ്സിലാക്കിയ ഡ്രൈവര് അപകടസാഹചര്യം വിലയിരുത്തി ബസ് സമീപത്തെ കോണ്ക്രീറ്റ് സംരക്ഷണഭിത്തിയിലേക്ക് ഇടിച്ചുനിര്ത്തുകയായിരുന്നു. ഇതോടെയാണ് വലിയ അപകടം ഒഴിവായത്.
നെയ്യാറ്റിന്കര ഡിപ്പോയിലെ പ്രിയദര്ശിനി പദ്ധതിയില് ഉള്പ്പെട്ട ബസാണ് അപകടത്തില്പ്പെട്ടത്. ബസില് നിരവധി യാത്രക്കാര് ഉണ്ടായിരുന്നെങ്കിലും ആര്ക്കും പരിക്കേറ്റിട്ടില്ല. നെയ്യാറ്റിന്കര ഡിപ്പോയില് നിന്ന് അന്നത്തെ ആദ്യ സര്വീസ് നടത്തുകയായിരുന്ന ബസാണ് അപകടത്തില്പ്പെട്ടത്. ഡ്രൈവറുടെ മനസ്സാന്നിധ്യവും അതിവേഗ തീരുമാനവുമാണ് നിരവധി യാത്രക്കാരുടെ ജീവന് രക്ഷിച്ചതെന്ന് യാത്രക്കാര് പറഞ്ഞു. സംഭവത്തെ തുടര്ന്ന് ബസ് സുരക്ഷിത സ്ഥലത്തേക്ക് മാറ്റി. ബ്രേക്ക് തകരാറിന്റെ കാരണം കണ്ടെത്താന് കെഎസ്ആര്ടിസി സാങ്കേതിക പരിശോധന നടത്തും.