മാഡ്രിഡ്: ലാ ലിഗ കിരീടം നിലനിര്ത്താനുള്ള പോരാട്ടത്തിന് വമ്പന് ജയത്തോടെ തുടക്കമിട്ട് ബാഴ്സലോണ. 2026-27 സീസണിലെ ആദ്യ മത്സരത്തില് എവേ ഗ്രൗണ്ടില് എല്ചെയെ മറുപടിയില്ലാത്ത അഞ്ച് ഗോളുകള്ക്ക് തോല്പ്പിച്ചു. റഫീഞ്ഞയും ഫെര്മിന് ലോപ്പസും ഇരട്ടഗോളുകള് നേടിയപ്പോള്, ഈ സീസണില് ബൊറൂസിയ ഡോര്ട്ട്മുണ്ടില് നിന്ന് ബാഴ്സലോണയിലെത്തിയ ജര്മന് താരം കരിം അഡെയേമി അരങ്ങേറ്റ മത്സരത്തില് തന്നെ ഗോള് നേടി.
14-ാം മിനിറ്റിലാണ് ബാഴ്സലോണ ലീഡെടുത്തത്. എല്ചെ പ്രതിരോധതാരം വിക്ടര് ചുസ്റ്റിന്റെ ഫൗളിനെ തുടര്ന്ന് ലഭിച്ച പെനാല്റ്റി റഫീഞ്ഞ അനായാസം വലയിലെത്തിച്ചു. ഇഞ്ചുറി ടൈമില് അഡെയേമി ബാഴ്സയുടെ ലീഡ് രണ്ടാക്കി. ലമീന് യമാല് വഴിയെത്തിയ നീക്കം റഫീഞ്ഞയുടെ മനോഹരമായ പാസില് അവസാനിച്ചപ്പോള്, ഓഫ്സൈഡ് കെണിയെ മറികടന്ന് അഡെയേമി ക്ലിനിക്കല് ഫിനിഷിലൂടെ ഗോള് നേടി.
രണ്ടാം പകുതിയില് എല്ചെ തിരിച്ചുവരവിന് ശ്രമിച്ചെങ്കിലും ബാഴ്സലോണയുടെ പകരക്കാരനായ ആന്റണി ഗോര്ഡന് കളിയുടെ ഗതി വീണ്ടും മാറ്റി. 67-ാം മിനിറ്റില് ഗോര്ഡന്റെ ഇടതുവിങ്ങില് നിന്നുള്ള മികച്ച നീക്കം റഫീഞ്ഞ പൂര്ത്തിയാക്കി. ഇതോടെ താരത്തിന്റെ രണ്ടാം ഗോളും ബാഴ്സയുടെ മൂന്നാം ഗോളുമായി. 71-ാം മിനിറ്റില് ഗോര്ഡന് വീണ്ടും അവസരം ഒരുക്കി. ഇത്തവണ ഫെര്മിന് ലോപ്പസ് ഒഴിഞ്ഞ പോസ്റ്റിലേക്ക് പന്ത് തട്ടിയിട്ട് സ്കോര് 4-0 ആക്കി.
79-ാം മിനിറ്റില് ഫെര്മിന് ലോപ്പസ് വീണ്ടും ലക്ഷ്യം കണ്ടതോടെ ബാഴ്സലോണയുടെ വിജയം 5-0 ആയി. സീസണിലെ ആദ്യ മത്സരത്തില് തന്നെ ആക്രമണ മികവ് പ്രകടിപ്പിച്ചാണ് നിലവിലെ ചാമ്പ്യന്മാര് ലാ ലിഗ കിരീട സംരക്ഷണത്തിന് തുടക്കമിട്ടത്.
