മലപ്പുറം: വീടിനുള്ളിൽ കയറിയ തെരുവുനായ അഞ്ച് മാസം പ്രായമുള്ള കുഞ്ഞിനെ കടിച്ചു. ഒതുക്കുങ്ങൽ തൊടുവത്തുപറമ്പിൽ ശനിയാഴ്ച ഉച്ചയോടെയായിരുന്നു സംഭവം. വീട്ടിലെ മുറിയിൽ ഉറങ്ങിക്കിടന്നിരുന്ന കുഞ്ഞിന്റെ സമീപത്തെത്തിയാണ് തെരുവുനായ ആക്രമിച്ചത്. കുഞ്ഞിന്റെ കരച്ചിൽ കേട്ട് ഓടിയെത്തിയ വീട്ടുകാർ നായയെ ഓടിച്ചുവിടുകയും ഉടൻ തന്നെ കുഞ്ഞിനെ രക്ഷപ്പെടുത്തി ആശുപത്രിയിലെത്തിക്കുകയുമായിരുന്നു.
പരിക്കേറ്റ കുഞ്ഞിനെ മഞ്ചേരി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. കുഞ്ഞിന്റെ ആരോഗ്യനില നിരീക്ഷിച്ചുവരികയാണ്. ഇതിനിടെ, ഇതേ തെരുവുനായയുടെ ആക്രമണത്തിൽ മറ്റ് രണ്ട് പേർക്കും കടിയേറ്റിട്ടുണ്ട്. ഇവരും സമീപത്തെ ആശുപത്രികളിൽ ചികിത്സ തേടി. വീടിനുള്ളിൽ കയറി കുഞ്ഞിനെ ആക്രമിച്ച സംഭവം പ്രദേശവാസികളിൽ വലിയ ആശങ്കയ്ക്ക് ഇടയാക്കിയിട്ടുണ്ട്. തെരുവുനായ ശല്യത്തിന് അടിയന്തര പരിഹാരം കാണണമെന്ന് നാട്ടുകാർ ആവശ്യപ്പെട്ടു.
