തിരുവനന്തപുരം: നേമം മണ്ഡലത്തിലെ വികസന പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനായി എംഎൽഎ ഓഫീസിൽ കൗൺസിലർമാരുടെ പ്രത്യേക അവലോകന യോഗം ചേർന്നു. എംഎൽഎ രാജീവ് ചന്ദ്രശേഖറിന്റെ അധ്യക്ഷതയിൽ നടന്ന യോഗത്തിൽ മണ്ഡലത്തിലെ വിവിധ വികസന പദ്ധതികളുടെ പുരോഗതി വിശദമായി വിലയിരുത്തി.
അടിസ്ഥാന സൗകര്യ വികസനത്തിന് മുൻഗണന നൽകേണ്ട മേഖലകൾ യോഗത്തിൽ ചർച്ച ചെയ്തു. വികസന പ്രവർത്തനങ്ങൾ കൂടുതൽ ഫലപ്രദമായി ഏകോപിപ്പിക്കുന്നതിനും ജനങ്ങളുടെ ആവശ്യങ്ങൾ സമയബന്ധിതമായി പരിഹരിക്കുന്നതിനുമായി വാർഡ് തല കർമപദ്ധതികൾക്ക് യോഗം രൂപം നൽകി.
മണ്ഡലത്തിലെ പ്രധാന ആരോഗ്യകേന്ദ്രമായ ശാന്തിവിള താലൂക്ക് ആശുപത്രിയുടെ വികസന പ്രവർത്തനങ്ങൾക്കും യോഗം പ്രത്യേക പ്രാധാന്യം നൽകി. നിർമ്മാണ പ്രവർത്തനങ്ങളുടെ ഗുണനിലവാരവും പുരോഗതിയും നേരിട്ട് വിലയിരുത്തുന്നതിനായി ആശുപത്രിയിൽ ഉടൻ സന്ദർശനം നടത്താനും തീരുമാനമായി.
വരാനിരിക്കുന്ന ഓണാഘോഷങ്ങൾ മണ്ഡലത്തിൽ ജനകീയമായി സംഘടിപ്പിക്കുന്നതിന്റെ ഭാഗമായി വാർഡ് അടിസ്ഥാനത്തിൽ വിശദമായ പ്രവർത്തനപദ്ധതികൾ തയ്യാറാക്കാൻ കൗൺസിലർമാർക്ക് നിർദേശം നൽകി.
ഓരോ വികസന പദ്ധതിയും ഗുണനിലവാരത്തോടെയും നിശ്ചിത സമയപരിധിക്കുള്ളിലും ജനങ്ങളിലെത്തിക്കുമെന്ന പ്രതിജ്ഞയോടെയാണ് യോഗം സമാപിച്ചത്.
