ന്യൂഡൽഹി: ഭക്ഷണത്തിന് പോലും ബുദ്ധിമുട്ടി ബോളിവുഡ് താരം ആമിർ ഖാന്റെ അർധസഹോദരൻ. ആമിർ ഖാന്റെ അർധസഹോദരൻ ഹൈദർ അലി ഖാൻ ഇന്ന് കടുത്ത സാമ്പത്തിക പ്രതിസന്ധിയിലാണെന്ന് മുൻ ഭാര്യയും നടിയുമായ ഇവ ഗ്രോവറാണ് വെളിപ്പെടുത്തിയത്. താമസിക്കാൻ സ്വന്തമായി വീടില്ലെന്നും ഭക്ഷണത്തിന് പോലും ബുദ്ധിമുട്ടുന്ന അവസ്ഥയിലാണെന്നും ഒരു അഭിമുഖത്തിൽ ഇവ പറഞ്ഞു.
“ഇപ്പോൾ ഹൈദറിന്റെ അവസ്ഥ വളരെ മോശമാണ്. താമസിക്കാൻ വീടില്ല. ചിലപ്പോൾ സുഹൃത്തുക്കളാണ് താമസിക്കാൻ സ്ഥലം നൽകുന്നത്. ഭക്ഷണത്തിനും ബുദ്ധിമുട്ടുകയാണ്. എന്തൊക്കെ സംഭവിച്ചാലും ഒരുകാലത്ത് അദ്ദേഹം എന്റെ ഭർത്താവായിരുന്നു. അതുകൊണ്ട് അദ്ദേഹത്തോട് സഹതാപമുണ്ട്,” എന്നാണ് ഇവ പറഞ്ഞത്.
അതേസമയം, വിവാഹജീവിതത്തിൽ അഞ്ചുവർഷത്തോളം ശാരീരികവും മാനസികവുമായി പീഡനം അനുഭവിച്ചെന്നും നടി ആരോപിച്ചു. പരിചയപ്പെട്ട് ദിവസങ്ങൾക്കകം വിവാഹം നടന്നെന്നും, വിവാഹത്തിന്റെ മൂന്നാം ദിവസം തന്നെ മർദനം ആരംഭിച്ചുവെന്നും ഇവ പറഞ്ഞു.
ഹൈദറിന് സ്കിസോഫ്രീനിയ എന്ന മാനസിക രോഗമുണ്ടായിരുന്നുവെന്നും വിവാഹസമയത്ത് അതിനെക്കുറിച്ച് തനിക്ക് അറിവില്ലായിരുന്നുവെന്നും അവർ പറഞ്ഞു. മദ്യപാനവും മാനസികാരോഗ്യ പ്രശ്നങ്ങളും കുടുംബജീവിതം തകർത്തു. മകളുടെ ജനനത്തിന് ശേഷവും സ്ഥിതി മെച്ചപ്പെട്ടില്ലെന്നും, ഒടുവിൽ വിവാഹമോചനം നേടേണ്ടിവന്നുവെന്നും ഇവ പറഞ്ഞു. മകളെ വർഷങ്ങളോളം കാണാൻ കഴിഞ്ഞില്ലെങ്കിലും പഠനച്ചെലവിനായി എല്ലാ മാസവും പണം അയച്ചിരുന്നുവെന്നും അവർ കൂട്ടിച്ചേർത്തു.
