പാരീസ്: ഫ്രഞ്ച് ഫുട്ബോളില് പുതിയ യുഗത്തിന് തുടക്കമായി. ഇതിഹാസ താരം സിനദിന് സിദാന് ഫ്രാന്സ് ദേശീയ ഫുട്ബോള് ടീമിന്റെ മുഖ്യപരിശീലകനായി ഔദ്യോഗികമായി ചുമതലയേറ്റു. ലോകകപ്പിന് പിന്നാലെ ദീര്ഘകാല പരിശീലകനായിരുന്ന ദിദിയര് ദെഷാംപ്സ് സ്ഥാനം ഒഴിഞ്ഞതോടെയാണ് സിദാന് ടീമിന്റെ ചുമതല കൈമാറിയത്. ഫ്രഞ്ച് ഫുട്ബോള് ഫെഡറേഷനും നിയമനത്തിന് ഔദ്യോഗിക അംഗീകാരം നല്കി.
14 വര്ഷത്തോളം ഫ്രാന്സ് ടീമിനെ നയിച്ച ദെഷാംപ്സ് 2018 ലോകകപ്പ് ഉള്പ്പെടെ നിരവധി നേട്ടങ്ങള് ടീമിന് സമ്മാനിച്ച പരിശീലകനാണ്. എന്നാല് ഏറ്റവും ഒടുവില് നടന്ന ലോകകപ്പില് ഫ്രാന്സിന് നാലാം സ്ഥാനമാണ് നേടാനായത്. മൂന്നാം സ്ഥാനത്തിനായുള്ള പോരാട്ടത്തില് ഇംഗ്ലണ്ടിനോട് 6-4ന് പരാജയപ്പെട്ടതോടെയാണ് ദെഷാംപ്സിന്റെ കാലഘട്ടം അവസാനിച്ചത്.
1998ല് ഫ്രാന്സിന് ലോകകപ്പ് നേടിക്കൊടുത്ത ടീമിലെ നിര്ണായക താരമായിരുന്ന സിദാന്, ഇപ്പോഴാണ് ആദ്യമായി ഒരു ദേശീയ ടീമിന്റെ മുഖ്യപരിശീലകന്റെ ചുമതല ഏറ്റെടുക്കുന്നത്. ക്ലബ് ഫുട്ബോളില് പരിശീലകനെന്ന നിലയില് ലോകം കണ്ട ഏറ്റവും വിജയകരമായ പേരുകളിലൊന്നാണ് സിദാന്.
റയല് മാഡ്രിഡിനെ രണ്ട് തവണ പരിശീലിപ്പിച്ച അദ്ദേഹം, തുടര്ച്ചയായി മൂന്ന് യുവേഫ ചാമ്പ്യന്സ് ലീഗ് കിരീടങ്ങള് നേടിക്കൊടുത്ത ഏക പരിശീലകരില് ഒരാളാണ്. ഇതിന് പുറമെ രണ്ട് ലാ ലിഗ കിരീടങ്ങള്, രണ്ട് ഫിഫ ക്ലബ് ലോകകപ്പ്, രണ്ട് യുവേഫ സൂപ്പര് കപ്പ്, രണ്ട് സ്പാനിഷ് സൂപ്പര് കപ്പ് എന്നിവയും സിദാന്റെ പരിശീലനത്തില് റയല് സ്വന്തമാക്കിയിരുന്നു.
2021ല് റയല് മാഡ്രിഡ് വിട്ടശേഷം പരിശീലനരംഗത്ത് നിന്ന് വിട്ടുനിന്ന സിദാന്, ഇപ്പോള് ഫ്രാന്സിന്റെ ദേശീയ ടീമിനൊപ്പമാണ് പുതിയ അധ്യായത്തിന് തുടക്കമിടുന്നത്. ഈ വര്ഷം നടക്കുന്ന യുവേഫ നേഷന്സ് ലീഗ് ടൂര്ണമെന്റായിരിക്കും ഫ്രാന്സ് പരിശീലകനെന്ന നിലയില് സിദാന്റെ ആദ്യ വലിയ പരീക്ഷണം.
