പാലക്കാട്: ചിറ്റൂർ ആര്യമ്പള്ളത്ത് യുവാവിനെ ദുരൂഹസാഹചര്യത്തിൽ മരിച്ച നിലയിൽ കണ്ടെത്തി. ആര്യമ്പള്ളം സ്വദേശിയായ എം. ഹരികൃഷ്ണൻ (24) ആണ് മരിച്ചത്.
ഇന്ന് പുലർച്ചെ അഞ്ച് മണിയോടെയാണ് കടയുടെ മുന്നിൽ റോഡരികിനോട് ചേർന്ന നിലയിൽ മൃതദേഹം കണ്ടെത്തിയത്. അടിവസ്ത്രം മാത്രമാണ് മൃതദേഹത്തിൽ ഉണ്ടായിരുന്നതെന്ന് പൊലീസ് അറിയിച്ചു.
സംഭവം ശ്രദ്ധയിൽപ്പെട്ട നാട്ടുകാർ വിവരമറിയിച്ചതിനെ തുടർന്ന് ചിറ്റൂർ പൊലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി. തുടർന്ന് മൃതദേഹം പോസ്റ്റ്മോർട്ടത്തിനായി മാറ്റി.
മരണത്തിന്റെ കാരണം ഇതുവരെ വ്യക്തമായിട്ടില്ല. അസ്വാഭാവിക മരണത്തിന് കേസെടുത്ത പൊലീസ് വിവിധ സാധ്യതകൾ പരിശോധിച്ച് അന്വേഷണം ആരംഭിച്ചു. സമീപത്തെ സി.സി.ടി.വി. ദൃശ്യങ്ങളും മറ്റ് ശാസ്ത്രീയ തെളിവുകളും കേന്ദ്രീകരിച്ചാണ് അന്വേഷണം പുരോഗമിക്കുന്നത്.
