ന്യൂഡൽഹി: സുരക്ഷയുടെ കാര്യത്തിൽ കരുത്ത് തെളിയിച്ച് ടാറ്റ മോട്ടോഴ്സ്. ഭാരത് എൻക്യാപ് (Bharat NCAP) ക്രാഷ് ടെസ്റ്റിൽ ടാറ്റ പഞ്ച് ഇവി അഞ്ച് സ്റ്റാർ സുരക്ഷാ റേറ്റിങ് സ്വന്തമാക്കി. ഇതോടെ ടാറ്റയുടെ സുരക്ഷാ മികവ് വീണ്ടും ശ്രദ്ധ നേടുകയാണ്.
മുതിർന്ന യാത്രക്കാരുടെ സുരക്ഷാ വിഭാഗത്തിൽ 32-ൽ 31.09 പോയിന്റും, കുട്ടികളുടെ സുരക്ഷാ വിഭാഗത്തിൽ 49-ൽ 45 പോയിന്റും നേടിയാണ് പഞ്ച് ഇവി ഫൈവ് സ്റ്റാർ റേറ്റിങ് കരസ്ഥമാക്കിയത്. മുൻവശത്തും വശങ്ങളിലുമുള്ള കൂട്ടിയിടികളിൽ ഡ്രൈവർക്കും യാത്രക്കാർക്കും മികച്ച സംരക്ഷണം നൽകുന്നുവെന്നാണ് ക്രാഷ് ടെസ്റ്റ് റിപ്പോർട്ട് വ്യക്തമാക്കുന്നത്. തലയും കഴുത്തും മികച്ച രീതിയിൽ സംരക്ഷിക്കപ്പെടുമ്പോൾ നെഞ്ചിനും കാൽമുട്ടിനും മികച്ച സുരക്ഷ ലഭിക്കുന്നതായും റിപ്പോർട്ടിൽ പറയുന്നു.
18 മാസവും മൂന്ന് വയസും പ്രായമുള്ള ചൈൽഡ് ഡമ്മികളെ ഉപയോഗിച്ചാണ് കുട്ടികളുടെ സുരക്ഷാ പരിശോധന നടത്തിയത്. പഞ്ച് ഇവിയുടെ അഡ്വഞ്ചർ 40, എംപവേർഡ് പ്ലസ് 40 വേരിയന്റുകളാണ് പരിശോധനയ്ക്ക് വിധേയമാക്കിയത്. ഈ ഫലങ്ങൾ പഞ്ച് ഇവിയുടെ എല്ലാ വേരിയന്റുകൾക്കും ബാധകമാണെന്ന് ഭാരത് എൻക്യാപ് അധികൃതർ അറിയിച്ചു.
ആറ് എയർബാഗുകൾ, ഐസോഫിക്സ് ചൈൽഡ് സീറ്റ് മൗണ്ട്, ത്രീ-പോയിന്റ് സീറ്റ് ബെൽറ്റ്, ഇലക്ട്രോണിക് സ്റ്റാബിലിറ്റി കൺട്രോൾ (ESC) തുടങ്ങിയ സുരക്ഷാ സംവിധാനങ്ങൾ എല്ലാ വേരിയന്റുകളിലും സ്റ്റാൻഡേർഡായി ടാറ്റ നൽകുന്നുണ്ട്.
അടുത്തിടെയാണ് ടാറ്റ പഞ്ച് ഇവിയുടെ പുതുക്കിയ പതിപ്പ് കമ്പനി അവതരിപ്പിച്ചത്. പുതിയ മോഡലിൽ 40 kWh ബാറ്ററി പാക്ക് ഉൾപ്പെടുത്തിയിട്ടുണ്ട്. ഒറ്റ ചാർജിൽ 468 കിലോമീറ്റർ വരെ സഞ്ചരിക്കാമെന്നാണ് കമ്പനിയുടെ അവകാശവാദം. നിലവിലുള്ള 30 kWh ബാറ്ററി പാക്കും തുടർന്നും ലഭ്യമാണ്.
7.2 kW, 3.3 kW എസി ചാർജറുകൾക്ക് പുറമെ 65 kW DC ഫാസ്റ്റ് ചാർജറും ലഭ്യമാണ്. ഈ ചാർജർ ഉപയോഗിച്ചാൽ വെറും 26 മിനിറ്റിനുള്ളിൽ 20 ശതമാനത്തിൽ നിന്ന് 80 ശതമാനം വരെ ബാറ്ററി ചാർജ് ചെയ്യാനാകും.
30 kWh ബാറ്ററി പാക്ക് വേരിയന്റിന് ₹9.69 ലക്ഷം മുതൽ ₹10.29 ലക്ഷം വരെയും, 40 kWh പതിപ്പിന് ₹10.89 ലക്ഷം മുതൽ ₹12.59 ലക്ഷം വരെയുമാണ് (എക്സ്-ഷോറൂം) വില. Battery-as-a-Service (BaaS) പദ്ധതിയിൽ ₹6.49 ലക്ഷം മുതൽ വാഹനം സ്വന്തമാക്കാനാകും. ഈ പദ്ധതിയിൽ ഒരു കിലോമീറ്ററിന് ₹2.60 എന്ന നിരക്കിലാണ് ബാറ്ററി വാടക ഈടാക്കുന്നത്.
