മോഖി (ചൈന): എഎച്ച്എഫ് വനിതാ ജൂനിയര് ഏഷ്യാ കപ്പ് ഹോക്കി കിരീടം ഇന്ത്യക്ക്. മോഖിയില് നടന്ന ആവേശകരമായ ഫൈനലില് ആതിഥേയരായ ചൈനയെ 1-0ന് തോല്പ്പിച്ചാണ് ഇന്ത്യന് വനിതകള് കിരീടം സ്വന്തമാക്കിയത്. ഇതോടെ ടൂര്ണമെന്റില് ഇന്ത്യ ഹാട്രിക് കിരീടം നേടി. കിരീടനേട്ടത്തോടെ ജൂനിയര് ഹോക്കി ലോകകപ്പിനും ഇന്ത്യ യോഗ്യത നേടി. മത്സരത്തിന്റെ 17-ാം മിനിറ്റിലാണ് സനിക ചന്ദ്രകാന്ത് മാനെ ഇന്ത്യയുടെ വിജയഗോള് നേടിയത്. ആദ്യ ക്വാര്ട്ടറില് ചൈന മത്സരത്തിന്റെ നിയന്ത്രണം ഏറ്റെടുത്തെങ്കിലും ഇന്ത്യന് പ്രതിരോധം ഉറച്ചുനിന്നു.
രണ്ടാം ക്വാര്ട്ടര് തുടങ്ങി രണ്ട് മിനിറ്റിനുള്ളില് ഇന്ത്യ ലീഡ് സ്വന്തമാക്കി. ചൈനീസ് പെനാല്റ്റി സര്ക്കിളിലേക്ക് എത്തിയ നീളന് സ്ലാപ്പ്-പുഷ് ചൈനീസ് ഗോള്കീപ്പര് ഷു മെങ്ജിയോയെ മറികടന്ന് സനിക വലയിലെത്തിക്കുകയായിരുന്നു. ടൂര്ണമെന്റിലുടനീളം തോല്വിയറിയാതെയാണ് ഇന്ത്യ കിരീടം സ്വന്തമാക്കിയത്. എലൈറ്റ് പൂളില് മൂന്ന് വിജയവും ഒരു സമനിലയുമായി ഒന്നാം സ്ഥാനത്തെത്തിയ ഇന്ത്യ, സെമിഫൈനലില് ദക്ഷിണ കൊറിയയെ 5-1ന് തകര്ത്താണ് ഫൈനലില് പ്രവേശിച്ചത്.
കിരീടനേട്ടത്തിന് പിന്നാലെ ഇന്ത്യന് ടീമിലെ ഓരോ താരത്തിനും 3 ലക്ഷം രൂപ വീതവും സപ്പോര്ട്ട് സ്റ്റാഫ് അംഗങ്ങള്ക്ക് 1.5 ലക്ഷം രൂപ വീതവും ഹോക്കി ഇന്ത്യ പാരിതോഷികം പ്രഖ്യാപിച്ചു.
