തൃശൂർ: വരവൂർ ഗവ. ഹയർ സെക്കൻഡറി സ്കൂളിൽ ഒമ്പതാം ക്ലാസ് വിദ്യാർഥിയെ അധ്യാപകൻ വടികൊണ്ട് ക്രൂരമായി മർദിക്കുന്ന ദൃശ്യങ്ങൾ പുറത്തുവന്നു. ക്ലാസ് മുറിക്കുള്ളിൽ നടന്ന സംഭവത്തിന്റെ ദൃശ്യങ്ങൾ സഹപാഠികളായ വിദ്യാർഥികൾ മൊബൈൽ ഫോണിൽ പകർത്തിയതാണെന്നാണ് വിവരം. ഈ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
ദൃശ്യങ്ങളിൽ മണികണ്ഠൻ എന്ന അധ്യാപകൻ വിദ്യാർഥിയെ വടികൊണ്ട് തുടർച്ചയായി അടിക്കുന്നതായി കാണാം. വിദ്യാർഥി ഭയന്നുനിൽക്കുന്നതിനിടെയും അധ്യാപകൻ പലതവണ വടികൊണ്ട് ആഞ്ഞടിക്കുന്ന ദൃശ്യങ്ങളാണ് പുറത്തുവന്നിരിക്കുന്നത്. ക്ലാസിൽ വച്ചാണ് സംഭവം നടന്നത്.
അധ്യാപകൻ കാഴ്ചപരിമിതിയുള്ള വ്യക്തിയാണെന്ന വിവരവും പുറത്തുവന്നിട്ടുണ്ട്. മർദനമേറ്റ വിദ്യാർഥിയുടെ കുടുംബം ചൈൽഡ് ലൈനിൽ പരാതി നൽകി. പരാതിയുടെ അടിസ്ഥാനത്തിൽ സംഭവത്തിൽ അന്വേഷണം നടത്തി ആവശ്യമായ നടപടികൾ സ്വീകരിക്കുമെന്ന് ബന്ധപ്പെട്ട അധികൃതർ അറിയിച്ചു.
