മുംബൈ: നാഗ്പുരിലെ പ്രാദേശിക ക്രിക്കറ്റ് അസോസിയേഷന് ടീമിലേക്ക് തിരഞ്ഞെടുക്കപ്പെടാതിരുന്നതിനെ തുടര്ന്ന് നിരാശയിലായിരുന്ന 17കാരി ക്രിക്കറ്റ് താരം മരിച്ച നിലയില്. മഹാരാഷ്ട്രയിലെ അക്കോള സ്വദേശിനിയായ അദിതി മോരേശ്വര് ചൗക്കണ്ടെയാണ് മരിച്ചത്. വിദര്ഭ ക്രിക്കറ്റ് അസോസിയേഷന് ടീമില് ഇടം നേടുക എന്ന ലക്ഷ്യത്തോടെ കഴിഞ്ഞ രണ്ട് വര്ഷമായി അദിതി കഠിന പരിശീലനം നടത്തിവരികയായിരുന്നു. എന്നാല് ഇത്തവണയും ടീമില് അവസരം ലഭിക്കാതിരുന്നതോടെ കടുത്ത മാനസിക സമ്മര്ദത്തിലായിരുന്നുവെന്നാണ് പ്രാഥമിക വിവരം.
സംഭവസ്ഥലത്ത് നിന്ന് പൊലീസ് കണ്ടെത്തിയ കുറിപ്പില് ‘എന്നെ തിരഞ്ഞെടുത്തില്ല’ എന്ന വാചകം രേഖപ്പെടുത്തിയിരുന്നുവെന്ന് അന്വേഷണ ഉദ്യോഗസ്ഥര് അറിയിച്ചു. ക്രിക്കറ്റില് മികച്ച കരിയര് ലക്ഷ്യമിട്ട് അമ്മയ്ക്കൊപ്പം നാഗ്പുരിലെ ലക്ഷ്മി നഗറിലായിരുന്നു അദിതി താമസിച്ചിരുന്നത്. കഴിഞ്ഞ രണ്ട് വര്ഷമായി സര്വെ ക്രിക്കറ്റ് അക്കാദമിയില് പരിശീലനം നടത്തി വരികയായിരുന്നു. അദിതിയുടെ സഹോദരനും ക്രിക്കറ്റ് താരമാണ്. സംഭവത്തില് ബജാജ് നഗര് പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്.
അദിതിയുടെ മരണത്തില് പ്രാദേശിക ക്രിക്കറ്റ് രംഗത്ത് ദുഃഖം രേഖപ്പെടുത്തി.
