ഇടുക്കി: ജില്ലയുടെ മലയോര മേഖലയിൽ ശക്തമായ മഴ തുടരുന്ന സാഹചര്യത്തിൽ ദേശീയപാത 85-ൽ നേര്യമംഗലം മുതൽ അടിമാലി വരെ വാഹനഗതാഗതം പൂർണമായും നിരോധിച്ചു. മണ്ണിടിച്ചിലിന് ഉയർന്ന സാധ്യതയുള്ളതിനാലാണ് ദുരന്തനിവാരണ വിഭാഗം അടിയന്തര നിയന്ത്രണം ഏർപ്പെടുത്തിയത്.
ഗതാഗത നിയന്ത്രണം ഉടൻ നടപ്പാക്കാൻ പോലീസിന് നിർദേശം നൽകിയിട്ടുണ്ട്. ഈ ഭാഗത്തേക്കുള്ള യാത്രകൾ പരമാവധി ഒഴിവാക്കണമെന്നും അത്യാവശ്യ സാഹചര്യം ഇല്ലെങ്കിൽ മലയോര മേഖലയിലേക്ക് യാത്ര ചെയ്യരുതെന്നും അധികൃതർ പൊതുജനങ്ങളോട് അഭ്യർഥിച്ചു.
അതേസമയം, കനത്ത മഴയും പ്രകൃതിക്ഷോഭ സാധ്യതയും കണക്കിലെടുത്ത് ഇടുക്കി ജില്ലയിലെ എല്ലാ വിനോദസഞ്ചാര പ്രവർത്തനങ്ങളും നേരത്തെ തന്നെ ജില്ലാ കളക്ടർ നിരോധിച്ചിരുന്നു. പുതിയ ഉത്തരവ് ഉണ്ടാകുന്നതുവരെ ഈ നിയന്ത്രണം തുടരുമെന്നും ജില്ലാ ഭരണകൂടം അറിയിച്ചു.
സംസ്ഥാനത്ത് ശക്തമായ മഴ തുടരുന്നതിനാൽ മലയോര മേഖലകളിൽ മണ്ണിടിച്ചിൽ, ഉരുൾപൊട്ടൽ, മരങ്ങൾ കടപുഴകിവീഴൽ തുടങ്ങിയ അപകടസാധ്യതകൾ നിലനിൽക്കുകയാണ്. അതിനാൽ കാലാവസ്ഥാ മുന്നറിയിപ്പുകൾ കൃത്യമായി പാലിക്കാനും അധികൃതരുടെ നിർദേശങ്ങൾ അനുസരിക്കാനും ദുരന്തനിവാരണ വിഭാഗം വീണ്ടും നിർദേശിച്ചു.