പത്തനംതിട്ട: സംസ്ഥാനത്ത് കനത്ത മഴയെ തുടർന്ന് വിവിധ മേഖലകളിൽ ദുരിതം നേരിടുന്ന ജനങ്ങൾക്ക് സഹായഹസ്തവുമായി ബിജെപിയും സേവാഭാരതിയും. പത്തനംതിട്ട ജില്ലയിലെ റാന്നി ബസ് സ്റ്റാൻഡിൽ നടന്ന ശുചീകരണ പ്രവർത്തനങ്ങളിൽ ഏർപ്പെട്ടിരുന്ന ബിജെപി–സേവാഭാരതി പ്രവർത്തകരെ ബിജെപി നിയമസഭാകക്ഷി നേതാവ് ബി.ബി. ഗോപകുമാർ എംഎൽഎയുടെ നേതൃത്വത്തിലുള്ള പ്രതിനിധി സംഘം സന്ദർശിച്ച് അഭിനന്ദിക്കുകയും പ്രവർത്തനങ്ങൾക്ക് പിന്തുണ അറിയിക്കുകയും ചെയ്തു.
ബിജെപി സംസ്ഥാന ജനറൽ സെക്രട്ടറി അഡ്വ. എസ്. സുരേഷ്, സംസ്ഥാന ഉപാധ്യക്ഷൻ കെ. സോമൻ, പത്തനംതിട്ട ജില്ലാ അധ്യക്ഷൻ വി.എ. സൂരജ്, മുതിർന്ന നേതാവ് ബി. രാധാകൃഷ്ണ മേനോൻ എന്നിവർക്കൊപ്പം ജില്ലയിലെ മറ്റ് ഭാരവാഹികളും എംഎൽഎയ്‌ക്കൊപ്പമുണ്ടായിരുന്നു.
ദുരിതത്തിന്റെ ഈ ഘട്ടത്തിൽ ഓരോ കുടുംബത്തിന്റെയും, സുരക്ഷയ്‌ക്കും, ക്ഷേമത്തിനും മുൻഗണന നൽകിയാണ് ബിജെപിയുടെയും, സേവാഭാരതിയുടെയും സേവനപ്രവർത്തനങ്ങൾ തുടരുന്നത്. “ദുരിതകാലത്ത് കൈകോർക്കാം” എന്ന സന്ദേശത്തോടെയാണ് പ്രവർത്തകർ വിവിധ മേഖലകളിൽ സേവന പ്രവർത്തനങ്ങൾ തുടരുന്നത്.
ആറന്മുള ദുരിതാശ്വാസ ക്യാംപും ബിജെപി സംഘം സന്ദർശിച്ചു. ക്യാംപ് ഓഫീസർ ശ്രീകാന്തുമായി കൂടിക്കാഴ്ച നടത്തി ക്യാംപിലെ നിലവിലെ സാഹചര്യങ്ങളും താമസ സൗകര്യങ്ങളും ദുരിതബാധിതർക്കായി ഒരുക്കിയ സംവിധാനങ്ങളും വിശദമായി വിലയിരുത്തി.
നിലവിൽ ക്യാമ്പിൽ പ്രദേശവാസികളായ 25 കുടുംബങ്ങളും, സമീപത്തെ എൽ.പി.എസ്. സ്കൂളിൽ നിന്ന് മാറ്റിപ്പാർപ്പിച്ച 46 അതിഥി തൊഴിലാളികളും കഴിയുന്നുണ്ടെന്ന് ഉദ്യോഗസ്ഥർ അറിയിച്ചു. ക്യാമ്പിലുള്ള എല്ലാവർക്കും ആവശ്യമായ അടിസ്ഥാന സൗകര്യങ്ങളും സുരക്ഷയും ഉറപ്പാക്കുന്നതിനായി ബന്ധപ്പെട്ട ഉദ്യോഗസ്ഥരുമായി എംഎൽഎ ചർച്ച നടത്തി.
പ്രതിസന്ധി ഘട്ടത്തിൽ രാവും പകലും പ്രവർത്തിക്കുന്ന സർക്കാർ ഉദ്യോഗസ്ഥരുടെയും സന്നദ്ധ പ്രവർത്തകരുടെയും സേവനത്തെ അദ്ദേഹം അഭിനന്ദിച്ചു. ദുരിതബാധിതരുടെ സുരക്ഷയ്‌ക്കും ക്ഷേമത്തിനും ആവശ്യമായ എല്ലാ പിന്തുണയും തുടർന്നും ലഭ്യമാക്കുമെന്നും അദ്ദേഹം ഉറപ്പുനൽകി.
