പത്തനംതിട്ട: ശബരിമലയിലെ നെയ്യ് വിതരണവുമായി ബന്ധപ്പെട്ട വിവാദത്തില് ദേവസ്വം വിജിലന്സ് അന്വേഷണം നടത്തും. ദേവസ്വം മന്ത്രി കെ. മുരളീധരന് അന്വേഷണത്തിന് ഉത്തരവിട്ടു. ദേവസ്വം സെക്രട്ടറി നടത്തിയ പ്രാഥമിക അന്വേഷണത്തില് ഗുരുതരമായ കണ്ടെത്തലുകള് ഉണ്ടായതിനെ തുടര്ന്നാണ് സമഗ്ര അന്വേഷണം നടത്താന് തീരുമാനിച്ചത്. സംഭവത്തില് ക്രിമിനല് ഗൂഢാലോചന നടന്നിട്ടുണ്ടോ എന്നതടക്കമുള്ള കാര്യങ്ങള് പരിശോധിക്കാനാണ് ദേവസ്വം വിജിലന്സിന് നിര്ദേശം നല്കിയിരിക്കുന്നത്.
തിരുവിതാംകൂര് ദേവസ്വം ബോര്ഡിന്റെ ചീഫ് വിജിലന്സ് ആന്ഡ് സെക്യൂരിറ്റി ഓഫീസര്ക്കാണ് അന്വേഷണച്ചുമതല. ഒരാഴ്ചയ്ക്കകം അന്വേഷണം പൂര്ത്തിയാക്കി റിപ്പോര്ട്ട് സമര്പ്പിക്കണമെന്നും മന്ത്രി അറിയിച്ചു. അതേസമയം, നെയ്യ് വിതരണത്തില് മില്മയ്ക്ക് യാതൊരു വീഴ്ചയും സംഭവിച്ചിട്ടില്ലെന്ന് മില്മ ചെയര്മാന് കെ.എസ്. മണി ആവര്ത്തിച്ചു. മില്മയ്ക്കെതിരെ പ്രചരിക്കുന്ന വാര്ത്തകള് അടിസ്ഥാനരഹിതമാണെന്നും മില്മയുടെ ഉല്പ്പന്നങ്ങളില് യാതൊരു കൃത്രിമവും നടന്നിട്ടില്ലെന്നും അദ്ദേഹം പറഞ്ഞു.
മില്മയുടെ നെയ്യ് വേണ്ടെന്ന് ദേവസ്വം ബോര്ഡ് അറിയിച്ചിട്ടില്ലെന്നും, ഭക്തര് സമര്പ്പിക്കുന്ന നെയ്യ് മതിയാകുന്നതിനാല് പുറത്തുനിന്ന് വാങ്ങേണ്ടതില്ലെന്നാണ് ബോര്ഡ് അറിയിച്ചതെന്നും കെ.എസ്. മണി വ്യക്തമാക്കി. സ്റ്റേറ്റ് ലാബില് പരിശോധന നടത്തി ഗുണനിലവാരം ഉറപ്പാക്കിയ ശേഷമാണ് നെയ്യ് ശബരിമലയിലേക്ക് അയച്ചതെന്നും ഗുണനിലവാരത്തില് വീഴ്ചയുണ്ടായതായി ദേവസ്വം ബോര്ഡ് ഔദ്യോഗികമായി അറിയിച്ചിട്ടില്ലെന്നും അദ്ദേഹം പറഞ്ഞു.
ക്രമക്കേടുകള് നടന്നിട്ടുണ്ടെങ്കില് അതില് മില്മയ്ക്ക് യാതൊരു പങ്കുമില്ലെന്നും അമിതലാഭത്തിനായി മില്മ ഒരിക്കലും കൃത്രിമം കാണിക്കാറില്ലെന്നും കെ.എസ്. മണി കൂട്ടിച്ചേര്ത്തു. മറ്റ് സംസ്ഥാനങ്ങളില് നിന്നുള്ള ഇടപാടുകാരുടെ പങ്ക് സംബന്ധിച്ച് സംശയമുണ്ടെന്നും മില്മയുടെ ലോഗോയോ ബ്രാന്ഡോ ദുരുപയോഗം ചെയ്തതായി കണ്ടെത്തിയാല് കര്ശന നിയമനടപടി സ്വീകരിക്കുമെന്നും അദ്ദേഹം മുന്നറിയിപ്പ് നല്കി. അന്വേഷണത്തില് മില്മയിലെ ഏതെങ്കിലും ഉദ്യോഗസ്ഥരുടെ പങ്ക് തെളിഞ്ഞാല് അവര്ക്കെതിരെയും ശക്തമായ നടപടി സ്വീകരിക്കുമെന്നും ചെയര്മാന് വ്യക്തമാക്കി.
