കോട്ടയം: തെക്കന് തമിഴ്നാടിന് മുകളിലായി രൂപപ്പെട്ട ചക്രവാതച്ചുഴിയുടെ സ്വാധീനത്തില് കേരളത്തില് ഓഗസ്റ്റ് ഏഴുവരെ ശക്തമായ മഴ തുടരുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഒറ്റപ്പെട്ട സ്ഥലങ്ങളില് ഇടിമിന്നലോടുകൂടിയ അതിശക്തമായ മഴയ്ക്കും മണിക്കൂറുകള്ക്കുള്ളില് വലിയ തോതില് മഴ ലഭിക്കാനും സാധ്യതയുള്ളതിനാല് പൊതുജനങ്ങള് അതീവ ജാഗ്രത പാലിക്കണമെന്ന് മുന്നറിയിപ്പ് നല്കി.
തിരുവനന്തപുരം, കൊല്ലം ജില്ലകള് ഒഴികെയുള്ള 12 ജില്ലകളില് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. കോഴിക്കോട്, മലപ്പുറം, തൃശൂര്, കോട്ടയം, ആലപ്പുഴ, പത്തനംതിട്ട ജില്ലകളില് പ്രൊഫഷണല് കോളേജുകള് ഉള്പ്പെടെ വിദ്യാഭ്യാസ സ്ഥാപനങ്ങള്ക്ക് ഇന്ന് അവധി പ്രഖ്യാപിച്ചിട്ടുണ്ട്. മലവെള്ളപ്പാച്ചില്, ഉരുള്പൊട്ടല്, മണ്ണിടിച്ചില് എന്നിവയ്ക്ക് സാധ്യതയുള്ളതിനാല് മലയോര മേഖലകളില് അനാവശ്യ യാത്രകള് ഒഴിവാക്കണമെന്നും വെള്ളക്കെട്ടുള്ള റോഡുകളിലൂടെയോ കരകവിഞ്ഞൊഴുകുന്ന നദികള് മുറിച്ചുകടക്കാനോ ശ്രമിക്കരുതെന്നും കാലാവസ്ഥാ വകുപ്പ് നിര്ദേശിച്ചു.
തീരപ്രദേശങ്ങളില് മണിക്കൂറില് 40 മുതല് 50 കിലോമീറ്റര് വരെയും ചില സമയങ്ങളില് 60 കിലോമീറ്റര് വരെ വേഗത്തില് ശക്തമായ കാറ്റിനും സാധ്യതയുണ്ട്. ഞായറാഴ്ച രാവിലെ 8.30 മുതല് തിങ്കളാഴ്ച രാവിലെ 8.30 വരെ സംസ്ഥാനത്ത് ശരാശരി 45.2 മില്ലിമീറ്റര് മഴയാണ് രേഖപ്പെടുത്തിയത്. കോഴിക്കോട് ആനക്കാംപൊയില് ഉള്പ്പെടെയുള്ള മലയോര മേഖലകളില് കഴിഞ്ഞ ദിവസങ്ങളില് അതിതീവ്ര മഴയാണ് ലഭിച്ചത്. വിവിധ ജില്ലകളിലെ നിരവധി കേന്ദ്രങ്ങളില് 60 മുതല് 100 മില്ലിമീറ്ററിലധികം മഴയും രേഖപ്പെടുത്തി.
അതേസമയം, സംസ്ഥാനത്ത് കഴിഞ്ഞ ദിവസങ്ങളിലുണ്ടായ കനത്ത മഴയ്ക്കിടയിലും ഈ മണ്സൂണ് സീസണില് ആകെ മഴയില് കുറവുണ്ടെന്നാണ് കേന്ദ്ര കാലാവസ്ഥാ വകുപ്പിന്റെ കണക്ക്. ജൂണ് 1 മുതല് ഓഗസ്റ്റ് 3 വരെ ലഭിക്കേണ്ട 1357.1 മില്ലിമീറ്റര് മഴയ്ക്കുപകരം 1038 മില്ലിമീറ്റര് മാത്രമാണ് ലഭിച്ചത്. ഇതോടെ സംസ്ഥാനത്ത് മഴക്കുറവ് 24 ശതമാനമായി.
ഏറ്റവും കൂടുതല് മഴക്കുറവ് വയനാട്ടിലാണ്. ഇവിടെ സാധാരണ ലഭിക്കേണ്ട മഴയേക്കാള് 50 ശതമാനം കുറവാണ് രേഖപ്പെടുത്തിയത്. ഇടുക്കിയില് 46 ശതമാനം കുറവും രേഖപ്പെടുത്തി. അതേസമയം, തിരുവനന്തപുരം ജില്ലയില് മാത്രമാണ് സാധാരണയെക്കാള് രണ്ട് ശതമാനം അധികമഴ ലഭിച്ചത്. കാലാവസ്ഥാ മുന്നറിയിപ്പുകള് തുടര്ച്ചയായി ശ്രദ്ധിക്കുകയും ദുരന്തനിവാരണ അതോറിറ്റിയുടെ നിര്ദേശങ്ങള് കര്ശനമായി പാലിക്കുകയും വേണമെന്ന് അധികൃതര് അഭ്യര്ഥിച്ചു.
