ബാങ്കോക്ക്: തായ്ലന്ഡില് നടന്ന പ്രാദേശിക ഫുട്ബോള് മത്സരത്തിനിടെ മൈതാനത്ത് മിന്നലേറ്റതിനെ തുടര്ന്ന് 24കാരനായ ഫുട്ബോള് താരം മരിച്ചു. വിങ്ങറായ സൊഫ്വാന് അവെയ്യാണ് (24) മരിച്ചത്. അപകടത്തില് ഗ്രൗണ്ടിലുണ്ടായിരുന്ന മറ്റ് 12 താരങ്ങള്ക്ക് പരിക്കേറ്റു. ഗൊലോക് എഫ്എ കപ്പ് ടൂര്ണമെന്റില് സംകോല്റ്റ്സും അബു നോങ് സിറിന് ടീമും തമ്മിലുള്ള മത്സരത്തിനിടെയായിരുന്നു ദുരന്തം. മഴയിലും ഇടിമിന്നല് സാധ്യത നിലനിന്ന സാഹചര്യത്തിലാണ് മത്സരം നടന്നത്.
സംഭവത്തിന്റെ ദൃശ്യങ്ങള് സമൂഹമാധ്യമങ്ങളില് വ്യാപകമായി പ്രചരിക്കുന്നുണ്ട്. വീഡിയോയില് മഴയില് മത്സരം പുരോഗമിക്കുന്നതിനിടെ പെട്ടെന്ന് മൈതാനത്തേക്ക് മിന്നലേറ്റതും തുടര്ന്ന് വലിയ ശബ്ദത്തോടൊപ്പം താരങ്ങള് നിലത്തുവീഴുന്നതും കാണാം. മിന്നലേറ്റ സൊഫ്വാന്റെ അടുത്തേക്ക് സഹതാരങ്ങള് ഓടിയെത്തി രക്ഷപ്പെടുത്താന് ശ്രമിച്ചെങ്കിലും ജീവന് രക്ഷിക്കാനായില്ല.
സംഭവത്തിന് പിന്നാലെ മെഡിക്കല് സംഘം അടിയന്തര ചികിത്സ നല്കിയെങ്കിലും സൊഫ്വാന് മരണത്തിന് കീഴടങ്ങുകയായിരുന്നു. പരിക്കേറ്റ മറ്റ് 12 താരങ്ങള് ചികിത്സ തേടിയതായി പ്രാദേശിക മാധ്യമങ്ങള് റിപ്പോര്ട്ട് ചെയ്തു. മത്സരം മഴയിലും ഇടിമിന്നല് സാധ്യതയിലും തുടരാന് അനുവദിച്ചതിനെതിരെ സമൂഹമാധ്യമങ്ങളില് വ്യാപക വിമര്ശനമാണ് ഉയരുന്നത്. കാലാവസ്ഥാ മുന്നറിയിപ്പുകള് അവഗണിച്ച സംഘാടകര് മറുപടി പറയണമെന്നും ഭാവിയില് ഇത്തരം മത്സരങ്ങളില് കൂടുതല് സുരക്ഷാ മുന്കരുതലുകള് ഉറപ്പാക്കണമെന്നും നിരവധി പേര് ആവശ്യപ്പെട്ടു.
സംഭവത്തില് തായ്ലന്ഡ് ഫുട്ബോള് അസോസിയേഷന് അനുശോചനം രേഖപ്പെടുത്തി. ‘ഈ ദുഃഖം അതിജീവിക്കാന് സൊഫ്വാന്റെ കുടുംബത്തിനും സുഹൃത്തുക്കള്ക്കും കരുത്ത് ലഭിക്കട്ടെ’ എന്നാണ് അസോസിയേഷന്റെ സന്ദേശം. തായ്ലന്ഡില് മിന്നലേറ്റ് മരിക്കുന്ന സംഭവങ്ങള് അപൂര്വമല്ല. രാജ്യത്തെ ഡിസീസ് കണ്ട്രോള് ഡിപ്പാര്ട്ട്മെന്റിന്റെ കണക്കുകള് പ്രകാരം 2020 മുതല് 2024 വരെ 283 പേരാണ് മിന്നലേറ്റ് മരിച്ചത്. ഇവരില് ഭൂരിഭാഗവും സംഭവസ്ഥലത്തുവെച്ചുതന്നെ മരണത്തിന് കീഴടങ്ങുകയായിരുന്നു.
