കണ്ണൂർ: ജോലി ചെയ്തിരുന്ന സ്ഥാപനത്തിൽ നിന്ന് ഏകദേശം 30 ലക്ഷം രൂപ വിലമതിക്കുന്ന സിഗരറ്റ് ഉൽപ്പന്നങ്ങൾ കവർച്ച ചെയ്ത കേസിൽ തമിഴ്നാട് സ്വദേശിയെ കണ്ണൂർ ടൗൺ പോലീസ് അറസ്റ്റ് ചെയ്തു. വിരുതുനഗർ സ്വദേശിയായ വേൽമുരുകൻ ആണ് പിടിയിലായത്.
കണ്ണൂർ ഹാജി റോഡിൽ പ്രവർത്തിക്കുന്ന ‘എബിൾ സ്റ്റോർ’ എന്ന സ്ഥാപനത്തിലെ സെയിൽസ്മാനായിരുന്നു വേൽമുരുകൻ. സ്ഥാപനത്തിലെ സ്റ്റോക്കിൽ നിന്ന് നിരന്തരം സിഗരറ്റ് പാക്കറ്റുകൾ മോഷ്ടിച്ച ശേഷം തമിഴ്നാട്ടിലെ വിവിധ കടകളിൽ എത്തിച്ച് വിൽപ്പന നടത്തുകയായിരുന്നു ഇയാളുടെ രീതിയെന്ന് പോലീസ് അറിയിച്ചു.
സ്റ്റോക്കിൽ വലിയ തോതിൽ കുറവ് കണ്ടെത്തിയതിനെ തുടർന്ന് സ്ഥാപനത്തിന്റെ പരാതിയിലാണ് അന്വേഷണം ആരംഭിച്ചത്. അന്വേഷണത്തിനിടെ പ്രതി സ്ഥാപനത്തിലെ സിഗരറ്റ് ഉൽപ്പന്നങ്ങൾ ക്രമമായി കടത്തിക്കൊണ്ടുപോയതായി കണ്ടെത്തിയതായി പോലീസ് അറിയിച്ചു.
സംഭവത്തിന് പിന്നാലെ ഒളിവിൽ പോയ വേൽമുരുകനെ പോലീസ് പ്രത്യേക അന്വേഷണത്തിലൂടെ തമിഴ്നാട്ടിലെ തെങ്കാശിയിൽ നിന്നാണ് പിടികൂടിയത്. കോടതിയിൽ ഹാജരാക്കിയ പ്രതിയെ തുടർനടപടികൾക്കായി റിമാൻഡ് ചെയ്തു. കേസിൽ കൂടുതൽ അന്വേഷണം പുരോഗമിക്കുകയാണെന്ന് കണ്ണൂർ ടൗൺ പോലീസ് അറിയിച്ചു.