മസ്കറ്റ്: ഇന്ത്യയിലേക്ക് വരികയായിരുന്ന വ്യാപാരക്കപ്പലിന് നേരെയുണ്ടായ ആക്രമണത്തിൽ ഒരു ഇന്ത്യൻ നാവികൻ കൊല്ലപ്പെട്ടു. ഒമാൻ തീരത്തിന് സമീപം ‘എംവി കേപ് ഡാവോ’ എന്ന കപ്പലിന് നേരെയായിരുന്നു ആക്രമണം. സംഭവത്തിൽ ഉത്തർപ്രദേശ് സ്വദേശിയായ സുരജ് യാദവ് കൊല്ലപ്പെട്ടതായി ഫോർവേഡ് സീമെൻസ് യൂണിയൻ ഓഫ് ഇന്ത്യ (FSUI) അറിയിച്ചു.
ആക്രമണത്തിൽ ഒരു ഇന്ത്യക്കാരൻ കൊല്ലപ്പെട്ട വിവരം ഒമാനിലെ ഇന്ത്യൻ എംബസിയും സ്ഥിരീകരിച്ചു. കപ്പലിലെ ജീവനക്കാരുടെ സുരക്ഷ ഉറപ്പാക്കാൻ ഒമാൻ അധികൃതരുമായി നിരന്തരം ഏകോപനം നടത്തിവരികയാണെന്ന് എംബസി അറിയിച്ചു. കപ്പലിൽ 19 ഇന്ത്യൻ പൗരന്മാരുണ്ടെന്നാണ് എംബസി വ്യക്തമാക്കിയത്. മരിച്ചയാളുടെ കുടുംബവുമായി ബന്ധപ്പെട്ടുവരികയാണെന്നും എംബസി അറിയിച്ചു.
അതേസമയം, കപ്പലിൽ 28 ജീവനക്കാരുണ്ടായിരുന്നുവെന്നും ഇതിൽ 20 പേർ ഇന്ത്യക്കാരാണെന്നും FSUI വ്യക്തമാക്കി. കണക്കുകളിൽ ഈ വ്യത്യാസം നിലനിൽക്കുന്നുണ്ട്. ആക്രമണത്തിൽ കപ്പലിന് നേരെ രണ്ട് ടോർപിഡോകൾ പതിച്ചതായും യൂണിയൻ അറിയിച്ചു. ഇതിൽ ഒന്ന് പോർട്ട് വശത്തെ സി-ഡെക്ക് താമസമേഖലയിലും മറ്റൊന്ന് എൻജിൻ റൂമിന് സമീപമുള്ള ഹള്ളിലുമാണ് പതിച്ചതെന്നാണ് വിവരം.
ദിയോറ സ്വദേശിയായ സുരജ് യാദവ് കപ്പലിൽ ‘വൈപ്പർ’ ആയി ജോലി ചെയ്യുകയായിരുന്നു. ആക്രമണത്തിൽ പരിക്കേറ്റ അദ്ദേഹം പിന്നീട് മരണത്തിന് കീഴടങ്ങിയതായി റിപ്പോർട്ടുകളുണ്ട്. കപ്പലിലുണ്ടായിരുന്ന മറ്റ് ജീവനക്കാരെ ഒമാൻ അധികൃതർ സുരക്ഷിതമായി കരയിലെത്തിച്ചതായും റിപ്പോർട്ടുകൾ വ്യക്തമാക്കുന്നു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
സംഭവത്തിൽ കടുത്ത ആശങ്ക രേഖപ്പെടുത്തിയ FSUI, ഹോർമുസ് കടലിടുക്കിലും പരിസരത്തും സിവിലിയൻ നാവികരുടെ സുരക്ഷ വീണ്ടും ചോദ്യചിഹ്നമായിരിക്കുകയാണെന്ന് ചൂണ്ടിക്കാട്ടി. ആക്രമണത്തിൽ ഉത്തരവാദിത്തം ഉറപ്പാക്കണമെന്നും സുരക്ഷിതമായ കടന്നുപോക്ക് ഉറപ്പാക്കണമെന്നും സുരജ് യാദവിനും അപകടത്തിൽ തുടരുന്ന മറ്റ് ഇന്ത്യൻ നാവികർക്കും നീതി ലഭ്യമാക്കണമെന്നും യൂണിയൻ ആവശ്യപ്പെട്ടു.
ഹോർമുസ് കടലിടുക്കിലൂടെയുള്ള കപ്പൽ ഗതാഗതത്തിന് സുരക്ഷാ ഭീഷണി നിലനിൽക്കുന്ന സാഹചര്യത്തിലാണ് ഇന്ത്യയിലേക്ക് വരികയായിരുന്ന കപ്പലിന് നേരെയും ആക്രമണമുണ്ടായിരിക്കുന്നത്. സംഭവത്തിൽ ഇന്ത്യൻ അധികൃതർ ഒമാൻ ഭരണകൂടവുമായി ഏകോപനം തുടരുകയാണ്.
