തിരുവനന്തപുരം: സംസ്ഥാനത്ത് ശക്തമായ മഴ തുടരുമെന്ന കേന്ദ്ര കാലാവസ്ഥാ വകുപ്പിന്റെയും സംസ്ഥാന ദുരന്തനിവാരണ അതോറിറ്റിയുടെയും മുന്നറിയിപ്പിനെ തുടര്ന്ന് തൃശൂര് ഉള്പ്പെടെ നാല് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ശനിയാഴ്ച അവധി പ്രഖ്യാപിച്ചു. തൃശൂര് ജില്ലയില് അങ്കണവാടികള്, നഴ്സറികള്, കേന്ദ്രീയ വിദ്യാലയങ്ങള്, സ്കൂളുകള്, പ്രൊഫഷണല് കോളേജുകള്, ട്യൂഷന് സെന്ററുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ജില്ലാ കളക്ടര് അവധി പ്രഖ്യാപിച്ചു.
കാസര്കോട് ജില്ലയില് പ്രൊഫഷണല് കോളേജുകള്, കോളേജുകള്, സ്കൂളുകള്, അങ്കണവാടികള്, മദ്രസകള്, മതപഠന കേന്ദ്രങ്ങള്, ട്യൂഷന് സെന്ററുകള് എന്നിവ ഉള്പ്പെടെ എല്ലാ വിദ്യാഭ്യാസ സ്ഥാപനങ്ങള്ക്കും അവധി ബാധകമാണ്. മുന്കൂട്ടി നിശ്ചയിച്ച പൊതുപരീക്ഷകള്ക്കും അഭിമുഖങ്ങള്ക്കും മാറ്റമില്ലെന്ന് ജില്ലാ ഭരണകൂടം അറിയിച്ചു.
വയനാട് ജില്ലയില് മതപഠന ക്ലാസുകള്, ട്യൂഷന് സെന്ററുകള്, സ്പെഷ്യല് ക്ലാസുകള്, കോച്ചിങ് സെന്ററുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചു. എന്നാല് റെസിഡന്ഷ്യല് സ്കൂളുകള്ക്കും കോളേജുകള്ക്കും അവധി ബാധകമല്ല. അവിടെയുള്ള വിദ്യാര്ഥികളുടെ സുരക്ഷ സ്ഥാപന മേധാവികള് ഉറപ്പാക്കണമെന്നും ആവശ്യമെങ്കില് അവധിനല്കാമെന്നും ജില്ലാ കളക്ടര് നിര്ദേശിച്ചു.
കോഴിക്കോട് ജില്ലയില് പ്രൊഫഷണല് കോളേജുകള് ഒഴികെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ശനിയാഴ്ച അവധിയാണ്. അങ്കണവാടികള്, മദ്രസകള്, ട്യൂഷന് സെന്ററുകള് എന്നിവയ്ക്കും അവധി ബാധകമാണ്. മുന്കൂട്ടി നിശ്ചയിച്ച പരീക്ഷകള്ക്കും ഓണ്ലൈന് ക്ലാസുകള്ക്കും അവധി ബാധകമല്ല.