ലിസ്ബണ്: ക്രിസ്റ്റ്യാനോ റൊണാള്ഡോയും പങ്കാളി ജോര്ജിന റോഡ്രിഗസും വിവാഹിതരാകുമെന്ന അഭ്യൂഹങ്ങള്ക്കിടെ പോര്ച്ചുഗലിലെ മഡെയ്റയില് അരങ്ങേറിയത് കൗതുകകരമായ സംഭവം. റൊണാള്ഡോയുടെ വിവാഹമെന്ന് കരുതി ആയിരക്കണക്കിന് ആരാധകര് ഫിന്ചാല് കത്തീഡ്രലിന് മുന്നില് തടിച്ചുകൂടിയപ്പോള്, ആഡംബര കാറിലെത്തിയത് മറ്റൊരു വധു!
ഈ മാസം എട്ടിന് റൊണാള്ഡോയും ജോര്ജിനയും മഡെയ്റയിലെ ഫിന്ചാല് കത്തീഡ്രലില് വിവാഹിതരാകുമെന്നായിരുന്നു സമൂഹമാധ്യമങ്ങളിലടക്കം പ്രചരിച്ചിരുന്നത്. പിന്നീട് ഇരുവരും ഈ റിപ്പോര്ട്ടുകള് നിഷേധിച്ചിരുന്നു. എന്നാല് അഭ്യൂഹം വിശ്വസിച്ച ആരാധകര് വിവാഹദിനത്തില് കത്തീഡ്രലിന് മുന്നില് എത്തുകയായിരുന്നു.
റൊണാള്ഡോയുടെ ഏഴാം നമ്പര് ജേഴ്സിയണിഞ്ഞ 2,000ത്തോളം ആരാധകരാണ് കത്തീഡ്രല് പരിസരത്ത് തടിച്ചുകൂടിയത്. ഇതിനിടെ ആഡംബര കാറില് വധു കത്തീഡ്രലിലേക്ക് എത്തിയതോടെ ആരാധകരുടെ ആവേശം ഇരട്ടിയായി. മൊബൈല് ഫോണുകളുമായി ആരാധകര് കാറിന് ചുറ്റും കൂടി റൊണാള്ഡോയുടെ പേര് വിളിച്ചു.
മഡെയ്റ സ്വദേശിനിയായ ഫാത്തിമ നിക്കോള് ആയിരുന്നു കാറിലെത്തിയത്. റൊണാള്ഡോയുടെ വിവാഹത്തിനല്ല, തന്റെ പങ്കാളിയായ ഫാബിയോ റാമോസുമായുള്ള വിവാഹത്തിനാണ് താന് എത്തിയതെന്ന് ഫാത്തിമ ആരാധകരോട് വ്യക്തമാക്കുകയായിരുന്നു. ജനക്കൂട്ടം ചുറ്റും കൂടിയതോടെ ആശയക്കുഴപ്പത്തിലായ വധുവിനെ സുരക്ഷാ ഉദ്യോഗസ്ഥര് ഇടപെട്ടാണ് കത്തീഡ്രലിനുള്ളിലേക്ക് സുരക്ഷിതമായി എത്തിച്ചത്. സംഭവത്തിന്റെ ദൃശ്യങ്ങള് സമൂഹമാധ്യമങ്ങളില് വൈറലായതോടെ റൊണാള്ഡോയും പ്രതികരിച്ചു. വീഡിയോയ്ക്ക് താഴെ പൊട്ടിച്ചിരിക്കുന്ന ഇമോജി കമന്റ് ചെയ്താണ് താരം സംഭവത്തോടുള്ള പ്രതികരണം അറിയിച്ചത്.
2016ല് സ്പെയിനിലെ മാഡ്രിഡിലെ ഒരു ഫാഷന് സ്റ്റോറില്വച്ചാണ് റൊണാള്ഡോയും ജോര്ജിനയും പരിചയപ്പെടുന്നത്. പിന്നീട് ഇരുവരും പ്രണയത്തിലായി. 2017ലാണ് ബന്ധം ആരാധകരോട് വെളിപ്പെടുത്തിയത്. 2025 ഓഗസ്റ്റിലാണ് ഇരുവരുടെയും വിവാഹനിശ്ചയം നടന്നത്. റൊണാള്ഡോയുടെ അഞ്ച് മക്കളില് രണ്ട് പേര് ജോര്ജിനയുമായുള്ള ബന്ധത്തിലുള്ളവരാണ്. അതേസമയം, ഇരുവരുടെയും വിവാഹ തീയതി സംബന്ധിച്ച് ഔദ്യോഗിക സ്ഥിരീകരണം ഇതുവരെ ഉണ്ടായിട്ടില്ല.
