കൊല്ക്കത്ത: മുന് ഇന്ത്യന് ക്യാപ്റ്റനും ക്രിക്കറ്റ് ഇതിഹാസവുമായ സൗരവ് ഗാംഗുലിക്കും ഭാര്യ ഡോണ ഗാംഗുലിക്കും വധഭീഷണി. കഴിഞ്ഞ ആറ് മാസമായി ഇരുവര്ക്കും നിരവധി ഭീഷണിക്കത്തുകള് ലഭിച്ചതായി റിപ്പോര്ട്ട്. സംഭവത്തില് ഗാംഗുലി കൊല്ക്കത്ത പൊലീസില് പരാതി നല്കി. തിങ്കളാഴ്ച ഗാംഗുലിയുടെ ഓഫീസില് രണ്ട് ഭീഷണിക്കത്തുകള് കൂടി ലഭിച്ചതോടെയാണ് സംഭവം ഗൗരവമായി പരിഗണിച്ച് പൊലീസില് പരാതി നല്കിയത്.
ഗാംഗുലിയെയും ഭാര്യയെയും വധിക്കുമെന്നും അടുത്ത ബന്ധുക്കളെപ്പോലും വെറുതെ വിടില്ലെന്നും കത്തില് ഭീഷണിപ്പെടുത്തിയതായി പൊലീസ് അറിയിച്ചു. ഗാംഗുലിയുടെ മാനേജര് പറയുന്നതനുസരിച്ച് ആറുമാസമായി സമാനമായ കത്തുകള് ലഭിച്ചിരുന്നെങ്കിലും ആദ്യഘട്ടത്തില് ഇവ കാര്യമായി എടുത്തിരുന്നില്ല. എന്നാല് ഏറ്റവും ഒടുവില് ലഭിച്ച കത്തിലെ ഭീഷണി ഗുരുതരമായതോടെയാണ് പരാതി നല്കിയത്.
ബംഗാള് ക്രിക്കറ്റ് അസോസിയേഷന് പ്രസിഡന്റായ ഗാംഗുലി ദക്ഷിണ കൊല്ക്കത്തയിലെ താക്കൂര്പുകുര് പൊലീസ് സ്റ്റേഷനിലാണ് പരാതി നല്കിയത്. കത്തുകളുടെ ഉറവിടവും കൊറിയര് വിവരങ്ങളും കേന്ദ്രീകരിച്ച് പൊലീസ് അന്വേഷണം ആരംഭിച്ചു. കൊറിയര് സര്വീസ് ജീവനക്കാരെ ചോദ്യം ചെയ്ത പൊലീസ് ഒരു മൊബൈല് നമ്പര് കണ്ടെത്തിയതായും റിപ്പോര്ട്ടുണ്ട്. നോര്ത്ത് 24 പര്ഗാനസ് ജില്ലയിലെ ബെല്ഘാരിയില് നിന്നുള്ള ഒരാളാണ് കത്തുകള് അയച്ചതെന്നാണ് പ്രാഥമിക സൂചന.
എല്ലാ കത്തുകള്ക്കും പിന്നില് ഒരേ വ്യക്തിയാണോ, ഭീഷണിയുടെ കാരണം എന്താണെന്നതും പൊലീസ് അന്വേഷിച്ചുവരികയാണ്.