പാറ്റ്ന: ഇൻസ്റ്റഗ്രാമിലൂടെ പരിചയപ്പെട്ട കാമുകനൊപ്പം ഒളിച്ചോടി വിവാഹിതയായതിന് പിന്നാലെ 19 കാരി മരിച്ചു. ബിഹാറിലെ പൂർണിയയിലാണ് സംഭവം. അരാരിയ സ്വദേശിനി മനീഷ കുമാരിയാണ് മരിച്ചത്.
കുടുംബം മറ്റൊരാളുമായി വിവാഹം ഉറപ്പിച്ചതോടെയാണ് മനീഷ കാമുകനായ ദിൽഖുഷ് കുമാറിനൊപ്പം വീട്ടിൽനിന്ന് പോയത്. പൂർണിയ ജംഗ്ഷൻ റെയിൽവേ സ്റ്റേഷനിൽ വച്ച് ദിൽഖുഷ് മനീഷയുടെ നെറ്റിയിൽ സിന്ദൂരം ചാർത്തി വിവാഹിതരായി. വിവാഹചിത്രം ദിൽഖുഷ് ഇൻസ്റ്റഗ്രാമിൽ പങ്കുവെക്കുകയും ചെയ്തു.
പിന്നീട് ക്ഷേത്രത്തിലേക്ക് പോകുന്നതിനിടെ മനീഷയ്ക്ക് കടുത്ത തലകറക്കവും ദേഹാസ്വാസ്ഥ്യവും അനുഭവപ്പെട്ടു. ആശുപത്രിയിലെത്തിച്ചെങ്കിലും ചികിത്സയ്ക്കിടെ മരിച്ചു. സംഭവത്തിൽ ദിൽഖുഷിനെ പൊലീസ് കസ്റ്റഡിയിലെടുത്തു. മരണകാരണം വ്യക്തമാകാൻ പോസ്റ്റ്മോർട്ടം റിപ്പോർട്ടിനായി കാത്തിരിക്കുകയാണെന്ന് പൊലീസ് അറിയിച്ചു.