ബെംഗളൂരു: പുകയിലയും നിക്കോട്ടിനും അടങ്ങിയ ഗുട്ട്ഖ, പാൻ മസാല എന്നിവയ്ക്ക് കർണാടകയിൽ ഒരുവർഷത്തേക്ക് നിരോധനം. ഇത്തരം ഉൽപ്പന്നങ്ങളുടെ നിർമ്മാണം, സംഭരണം, വിതരണം, വിൽപ്പന എന്നിവയ്ക്കാണ് സംസ്ഥാനത്ത് വിലക്ക് ഏർപ്പെടുത്തിയത്. പൊതുജനാരോഗ്യ പ്രശ്നങ്ങൾ ചൂണ്ടിക്കാട്ടി കർണാടക ഭക്ഷ്യസുരക്ഷാ കമ്മിഷണർ ജൂൺ 15ന് പുറത്തിറക്കിയ വിജ്ഞാപനത്തിലാണ് നിരോധനം പ്രഖ്യാപിച്ചത്.
പാക്ക് ചെയ്തതും അല്ലാത്തതുമായ ഉൽപ്പന്നങ്ങൾക്ക് നിരോധനം ബാധകമാണ്. സാഷെറ്റ്, പൗച്ച്, പാക്കറ്റ്, കണ്ടെയ്നർ തുടങ്ങിയവയിൽ വിൽക്കുന്ന ഉൽപ്പന്നങ്ങളും ഇതിൽ ഉൾപ്പെടും. പുകയിലയും പാൻ മസാലയും വെവ്വേറെ ഉൽപ്പന്നങ്ങളായി വിൽക്കുകയും ഉപഭോക്താവിന് എളുപ്പത്തിൽ ഇവ രണ്ടും ചേർത്ത് ഉപയോഗിക്കാവുന്ന തരത്തിൽ പാക്ക് ചെയ്യുകയും ചെയ്യുന്ന രീതിക്കും നിരോധനം ബാധകമാണ്.
