പത്തനംതിട്ട/തിരുവനന്തപുരം: ചിങ്ങമാസ പൂജകൾക്കും ഓണം പൂജകൾക്കുമായി ശബരിമലയിൽ ഒരുക്കങ്ങൾ പൂർത്തിയായി. ചിങ്ങമാസ പൂജയ്ക്കായി ആഗസ്റ്റ് 16ന് വൈകിട്ട് 5 മണിക്ക് ശബരിമല നട തുറക്കും. ഭക്തരുടെ യാത്ര സുഗമമാക്കുന്നതിനായി കെഎസ്ആർടിസിയും വിവിധ യൂണിറ്റുകളിൽ നിന്ന് പമ്പയിലേക്കും തിരിച്ചും പ്രത്യേക സർവീസുകൾ ഒരുക്കിയിട്ടുണ്ട്. ആഗസ്റ്റ് 16 മുതൽ 28 വരെയാണ് പ്രത്യേക സർവീസുകൾ ക്രമീകരിച്ചിരിക്കുന്നത്.
ആഗസ്റ്റ് 16ന് വൈകിട്ട് അഞ്ച് മണിക്ക് തന്ത്രി കണ്ഠര് ബ്രഹ്മദത്തന്റെ സാന്നിധ്യത്തിൽ മേൽശാന്തി പ്രസാദ് ഇ ഡി നടതുറന്ന് ദീപം തെളിയിക്കും. തുടർന്ന് പതിനെട്ടാംപടിക്ക് താഴെയുള്ള ആഴിയിൽ അഗ്നി പകരും. ചിങ്ങമാസത്തിലെ ഒന്നാം തീയതിയായ ആഗസ്റ്റ് 17ന് രാവിലെ അഞ്ച് മണിയോടെയാണ് ഭക്തർക്ക് ദർശനത്തിനായി നട തുറക്കുക.
ചിങ്ങം ഒന്നിന് തന്നെ ശബരിമല ഉൾക്കഴകത്തെ തെരഞ്ഞെടുക്കുന്നതിനുള്ള നറുക്കെടുപ്പും നടക്കും. രാവിലെ ഉഷഃപൂജയ്ക്ക് ശേഷമായിരിക്കും തെരഞ്ഞെടുപ്പ്. മേൽശാന്തിയെ പൂജാകാര്യങ്ങളിൽ സഹായിക്കുകയാണ് ഉൾക്കഴകത്തിന്റെ പ്രധാന ചുമതല. ചിങ്ങം ഒന്നുമുതൽ വൈകിട്ട് ദീപാരാധനയ്ക്ക് ശേഷം പതിനെട്ടാംപടിയിൽ പടിപൂജയും നടക്കും.
ചിങ്ങമാസ പൂജകൾ പൂർത്തിയാക്കി ആഗസ്റ്റ് 21ന് രാത്രി 10 മണിക്ക് ശബരിമല നട അടയ്ക്കും. തുടർന്ന് ഓണവുമായി ബന്ധപ്പെട്ട പൂജകൾക്കായി ആഗസ്റ്റ് 24ന് വീണ്ടും നട തുറക്കും.
വെർച്വൽ ക്യൂ വഴി ദർശന സ്ലോട്ട് ഉറപ്പാക്കണം
ചിങ്ങമാസ പൂജയുടെ ഭാഗമായി ശബരിമല ദർശനത്തിന് എത്തുന്ന ഭക്തർ വെർച്വൽ ക്യൂ സംവിധാനത്തിലൂടെ മുൻകൂട്ടി ദർശന സ്ലോട്ട് ഉറപ്പാക്കണം. ഇതിനായി www.sabarimalaonline.org എന്ന വെബ്സൈറ്റ് വഴി ബുക്കിങ് നടത്താം.
അതേസമയം, ശബരിമല തീർഥാടകരുടെ യാത്ര സുഗമമാക്കാൻ കെഎസ്ആർടിസി വിപുലമായ യാത്രാ ക്രമീകരണങ്ങളാണ് ഒരുക്കിയിരിക്കുന്നത്. തിരുവനന്തപുരം, ചെങ്ങന്നൂർ, പത്തനംതിട്ട, കൊട്ടാരക്കര, എരുമേലി, പുനലൂർ തുടങ്ങിയ പ്രധാന സർവീസ് കേന്ദ്രങ്ങളിൽ നിന്ന് പമ്പയിലേക്ക് പ്രത്യേക സർവീസുകൾ ഉണ്ടായിരിക്കും.
ട്രെയിൻ മാർഗം ചെങ്ങന്നൂർ റെയിൽവേ സ്റ്റേഷനിൽ എത്തുന്ന അയ്യപ്പഭക്തർക്കായി ചെങ്ങന്നൂർ റെയിൽവേ സ്റ്റേഷൻ–പമ്പ റൂട്ടിൽ ആവശ്യാനുസരണം ഏത് സമയത്തും സർവീസുകൾ ക്രമീകരിക്കും. പമ്പയിൽ നിന്ന് ചെങ്ങന്നൂരിലേക്കും ആവശ്യാനുസരണം സർവീസുകൾ ലഭ്യമാക്കും.
നിലയ്ക്കൽ–പമ്പ സർവീസുകളും വിപുലമാക്കും
തീർഥാടകരുടെ യാത്ര സുഗമമാക്കുന്നതിനായി നിലയ്ക്കൽ–പമ്പ ചെയിൻ സർവീസുകളും വിപുലമായി ക്രമീകരിച്ചിട്ടുണ്ട്. യാത്രക്കാരുടെ തിരക്ക് കണക്കിലെടുത്ത് തിരുവനന്തപുരം സെൻട്രൽ ഡിപ്പോയിൽ നിന്ന് ബസുകൾ മുൻകൂട്ടി ബുക്ക് ചെയ്യാനുള്ള സൗകര്യവും ഒരുക്കിയിട്ടുണ്ട്.
തിരക്ക് വർധിക്കുന്ന ദിവസങ്ങളിൽ ഭക്തരുടെ ആവശ്യാനുസരണം സമീപത്തെ കെഎസ്ആർടിസി യൂണിറ്റുകളിൽ നിന്ന് അധിക സർവീസുകൾ ആരംഭിക്കാനും സംവിധാനമുണ്ട്. അതുകൊണ്ടുതന്നെ ചിങ്ങമാസ പൂജയ്ക്കും ഓണം പൂജയ്ക്കുമായി ശബരിമലയിലേക്ക് എത്തുന്ന ഭക്തർക്ക് യാത്രാ സൗകര്യത്തിൽ വലിയ ആശ്വാസമാകും കെഎസ്ആർടിസിയുടെ പ്രത്യേക ക്രമീകരണങ്ങൾ.
ഭക്തരുടെ സുരക്ഷിതവും സുഗമവുമായ യാത്ര ഉറപ്പാക്കുന്നതിനാണ് പ്രത്യേക സംവിധാനങ്ങൾ ഒരുക്കിയിരിക്കുന്നതെന്ന് കെഎസ്ആർടിസി അധികൃതർ അറിയിച്ചു.