ന്യൂഡല്‍ഹി: മുന്‍ പ്രധാനമന്ത്രിയും ഭാരതരത്‌ന ജേതാവുമായ അടല്‍ ബിഹാരി വാജ്‌പേയിയുടെ എട്ടാം ചരമവാര്‍ഷികത്തില്‍ രാജ്യം അദ്ദേഹത്തെ അനുസ്മരിച്ചു. പ്രധാനമന്ത്രി നരേന്ദ്ര മോദി വാജ്‌പേയിയുടെ സ്മാരകമായ ‘സദൈവ് അടല്‍’ സന്ദര്‍ശിച്ച് പുഷ്പാര്‍ച്ചന നടത്തി. പ്രധാനമന്ത്രി മോദിക്ക് മുമ്പ് രാഷ്‌ട്രപതി ദ്രൗപതി മുര്‍മുവും ഉപരാഷ്‌ട്രപതി സി.പി. രാധാകൃഷ്ണനും സ്മാരകത്തിലെത്തി ആദരാഞ്ജലി അര്‍പ്പിച്ചു. പ്രതിരോധ മന്ത്രി രാജ്‌നാഥ് സിങ് ഉള്‍പ്പെടെയുള്ള മുതിര്‍ന്ന നേതാക്കളും വാജ്‌പേയിയുടെ സ്മാരകത്തിലെത്തി.
”ശ്രദ്ധേയമായ ദര്‍ശനമുള്ള അസാധാരണ രാഷ്‌ട്രതന്ത്രജ്ഞനെന്ന നിലയില്‍ അദ്ദേഹം തന്റെ ജീവിതം രാഷ്‌ട്രസേവനത്തിനായി സമര്‍പ്പിച്ചു. അദ്ദേഹത്തിന്റെ ചിന്തകളും പരിശ്രമങ്ങളും തലമുറകളെ പ്രചോദിപ്പിച്ചു. സദ്ഭരണത്തിനും പൊതുജനക്ഷേമത്തിനും അദ്ദേഹം നല്‍കിയ ഊന്നല്‍ എപ്പോഴും നമ്മെ നയിക്കും,” പ്രധാനമന്ത്രി മോദി സമൂഹമാധ്യമത്തില്‍ കുറിച്ചു.
ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥും വാജ്‌പേയിക്ക് ആദരാഞ്ജലി അര്‍പ്പിച്ചു. ദേശസ്‌നേഹത്തിന്റെയും ജനാധിപത്യ മൂല്യങ്ങളുടെയും ആദര്‍ശ രാഷ്‌ട്രീയത്തിന്റെയും പ്രതീകമായിരുന്നു വാജ്‌പേയിയെന്ന് യോഗി പറഞ്ഞു. ശക്തമായ ചിന്തയും മാന്യമായ പെരുമാറ്റവും സമര്‍പ്പിത ജീവിതവും കൊണ്ട് ഇന്ത്യന്‍ ജനാധിപത്യത്തില്‍ ഉയര്‍ന്ന മൂല്യങ്ങള്‍ സ്ഥാപിച്ച നേതാവായിരുന്നു വാജ്‌പേയിയെന്നും അദ്ദേഹത്തിന്റെ ജീവിതം ‘രാഷ്‌ട്രം ആദ്യം’ എന്ന ആശയത്തിന്റെ ഉദാഹരണമാണെന്നും യോഗി വ്യക്തമാക്കി.
