കൊച്ചി: വേറിട്ട ശബ്ദസൗന്ദര്യം കൊണ്ട് മലയാള സംഗീതരംഗത്ത് തന്റേതായ ഇടം നേടിയ വൈക്കം വിജയലക്ഷ്മിയുടെ ശബ്ദത്തിൽ പുതിയൊരു നാടൻ പാട്ട് കൂടി. ജി. മാർത്താണ്ഡൻ സംവിധാനം ചെയ്യുന്ന ‘ഓട്ടംതുള്ളൽ’ എന്ന ചിത്രത്തിലെ “മരം കൊത്തി വേഗത്തിൽ, മനം കൊത്തി നീറുന്നു… എൻ തുയിർ…” എന്ന് തുടങ്ങുന്ന ലിറിക്കൽ വീഡിയോ ഗാനമാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്.
പുറത്തുവന്ന് വളരെ ചുരുങ്ങിയ സമയത്തിനുള്ളിൽ തന്നെ ഗാനത്തിന് നവമാധ്യമങ്ങളിൽ വലിയ സ്വീകാര്യതയാണ് ലഭിക്കുന്നത്. തനതായ ശബ്ദവും നാടൻ ശീലുകളോടുള്ള പ്രത്യേക അടുപ്പവുമാണ് വൈക്കം വിജയലക്ഷ്മിയുടെ നിരവധി ഹിറ്റുകൾക്കും പ്രത്യേകത നൽകുന്നത്. അതേ സംഗീതഭാവം പുതിയ ഗാനത്തിലും പ്രകടമാണ്.
ഉടൻ പ്രദർശനത്തിനെത്തുന്ന ‘ഓട്ടംതുള്ളൽ’ എന്ന ചിത്രത്തിന്റെ പ്രമോഷന്റെ ഭാഗമായാണ് ലിറിക്കൽ വീഡിയോ ഗാനം പുറത്തിറക്കിയത്.
ബി.കെ. ഹരിനാരായണൻ വരികൾ എഴുതിയ ഗാനത്തിന് രാഹുൽ രാജാണ് സംഗീതം നൽകിയിരിക്കുന്നത്. വൈക്കം വിജയലക്ഷ്മിയുടെ വ്യത്യസ്തമായ ആലാപനശൈലിയും നാടൻ സംഗീതത്തിന്റെ സ്വാഭാവികതയും ചേർന്നതാണ് ഗാനത്തിന്റെ പ്രധാന ആകർഷണം.
സാധാരണക്കാർ താമസിക്കുന്ന ഒരു ഗ്രാമത്തിൽ ഒരു കുടുംബത്തിൽ അരങ്ങേറുന്ന ഒരു പ്രശ്നം പിന്നീട് ആ ഗ്രാമത്തിന്റെ തന്നെ പ്രശ്നമായി മാറുന്നതാണ് ‘ഓട്ടംതുള്ളൽ’ പറയുന്നത്. തികഞ്ഞ നർമ്മ മുഹൂർത്തങ്ങളിലൂടെ ഗ്രാമീണ ജീവിതത്തിന്റെ പശ്ചാത്തലത്തിൽ കഥ അവതരിപ്പിക്കുകയാണ് സംവിധായകൻ ജി. മാർത്താണ്ഡൻ.
തനി നാടൻ കഥയായാണ് അണിയറപ്രവർത്തകർ ചിത്രത്തെ വിശേഷിപ്പിക്കുന്നത്.
വിജയരാഘവൻ കേന്ദ്ര കഥാപാത്രത്തെ അവതരിപ്പിക്കുന്ന ചിത്രത്തിൽ വിഷ്ണു ഉണ്ണികൃഷ്ണൻ, ടിനി ടോം, ഹരിശ്രീ അശോകൻ, മനോജ് കെ.യു., ബിനു ശിവറാം, ജിയോ ബേബി, സിദ്ധാർത്ഥ് ശിവ, കുട്ടി അഖിൽ ജെറോം, ബിപിൻ ചന്ദ്രൻ, പ്രിയനന്ദൻ, വൈക്കം ഭാസി, ആദിനാട് ശശി, റോയ് തോമസ്, മാസ്റ്റർ ശ്രീപത് യാൻ, അനിയപ്പൻ, ശ്രീരാജ് എന്നിവരും പ്രധാന വേഷങ്ങളിലെത്തുന്നു.
പൗളി വത്സൻ, സേതുലക്ഷ്മി, ജസ്ന്യ കെ. ജയദീഷ്, ചിത്രാ നായർ, പ്രിയ കോട്ടയം, ബിന്ദു അനീഷ്, ലതാദാസ്, അജീഷ, രാജി മേനോൻ, ബേബി റിഹരാജ് എന്നിവരും ചിത്രത്തിലുണ്ട്. ബിബിൻ ജോർജ് സുപ്രധാനമായ ഒരു കഥാപാത്രത്തെയാണ് അവതരിപ്പിക്കുന്നത്.
ബിനു ശശി റാമിന്റേതാണ് തിരക്കഥ. പ്രദീപ് നായർ ഛായാഗ്രഹണവും ജോൺകുട്ടി എഡിറ്റിംഗും നിർവഹിക്കുന്നു. സുജിത് രാഘവാണ് കലാസംവിധാനം. അമൽ സി. ചന്ദ്രൻ മേക്കപ്പ് വിഭാഗം കൈകാര്യം ചെയ്യുന്നു. കോസ്റ്റ്യൂം ഡിസൈൻ സിജി തോമസ് നോബൽ.
അജയ് ചന്ദ്രിക, പ്രശാന്ത് ഈഴവൻ എന്നിവർ ചീഫ് അസോസിയേറ്റ് ഡയറക്ടർമാരാണ്. സജ്യൂ പൊറ്റയിൽക്കട, ഡിഫിൻ ബാലൻ എന്നിവർ അസോസിയേറ്റ് ഡയറക്ടർമാരായി പ്രവർത്തിക്കുന്നു.
അജി മസ്കറ്റാണ് പ്രൊഡക്ഷൻ സ്റ്റിൽസ് നിർവഹിക്കുന്നത്. റഫീഖ് ഖാൻ, മെൽബിൻ ഫെലിക്സ് എന്നിവർ പ്രൊഡക്ഷൻ മാനേജർമാരാണ്. ബിജു കടവൂർ പ്രൊഡക്ഷൻ കൺട്രോളറാണ്.
ആദ്യാ പ്രൊഡക്ഷൻസ് അവതരിപ്പിക്കുന്ന ചിത്രം JKS പ്രൊഡക്ഷൻസിന്റെ ബാനറിൽ മോഹൻ നെല്ലിക്കാട്ടാണ് നിർമ്മിക്കുന്നത്. സിറിയക്ക് ആലഞ്ചേരിയാണ് കോ-പ്രൊഡ്യൂസർ. ഹിരൺ മഹാജാനും ജി. മാർത്താണ്ഡനും എക്സിക്യൂട്ടീവ് പ്രൊഡ്യൂസർമാരാണ്.
ഗ്രാമീണ ജീവിതത്തിലെ നിത്യസംഭവങ്ങളെയും കുടുംബപ്രശ്നങ്ങളെയും നർമ്മത്തിന്റെ അകമ്പടിയോടെ അവതരിപ്പിക്കുന്ന ചിത്രത്തിൽ സംഗീതത്തിനും പ്രധാന സ്ഥാനമാണുള്ളത്. അതിന്റെ ആദ്യ സൂചനയായി എത്തിയിരിക്കുകയാണ് വൈക്കം വിജയലക്ഷ്മിയുടെ ‘മരംകൊത്തി’.
ചിത്രം ഉടൻ തിയറ്ററുകളിലെത്താനിരിക്കെ, പ്രമോഷന്റെ ഭാഗമായി പുറത്തിറങ്ങിയ ഈ ഗാനം ഇതിനോടകം തന്നെ പ്രേക്ഷകശ്രദ്ധ പിടിച്ചുപറ്റിക്കഴിഞ്ഞു.
