പത്തനംതിട്ട: പ്രസിദ്ധമായ ആറന്മുള വള്ളസദ്യയുടെ പേരിൽ തട്ടിപ്പ് നടത്തിയെന്ന പരാതിയിൽ ആറന്മുള പോലീസ് കേസെടുത്തു. ഹരിപ്പാട് സ്വദേശിനിയായ യുവതിയാണ് തട്ടിപ്പിനിരയായത്. സാമൂഹിക മാധ്യമത്തിലൂടെ പരിചയപ്പെട്ട വ്യക്തി ആറന്മുള ക്ഷേത്ര ജീവനക്കാരനാണെന്ന് അവകാശപ്പെട്ടാണ് യുവതിയെ കബളിപ്പിച്ചതെന്നാണ് പരാതി.
നാലുപേർക്ക് ആറന്മുള വള്ളസദ്യ കഴിക്കുന്നതിനുള്ള പാസ് തരപ്പെടുത്തി നൽകാമെന്ന് ഇയാൾ യുവതിയെ അറിയിക്കുകയായിരുന്നു. പാസ് ലഭിക്കുന്നതിനായി 2,000 രൂപ അയച്ചുനൽകണമെന്നും ആവശ്യപ്പെട്ടു. ഇയാളുടെ വാക്കുകൾ വിശ്വസിച്ച യുവതി ആവശ്യപ്പെട്ട തുക അയച്ചുനൽകി.
പണം നൽകിയ ശേഷം വള്ളസദ്യയിൽ പങ്കെടുക്കുന്നതിനായി ക്ഷേത്രത്തിലെത്തിയപ്പോഴാണ് താൻ കബളിപ്പിക്കപ്പെട്ട വിവരം യുവതി മനസ്സിലാക്കിയത്. പാസ് ലഭിക്കാതിരുന്നതിനെ തുടർന്ന് ആറന്മുള പോലീസ് സ്റ്റേഷനിൽ പരാതി നൽകുകയായിരുന്നു.
പരാതിയെ തുടർന്ന് ആറന്മുള എസ്.എച്ച്.ഒ വിവരം ജില്ലാ പോലീസ് മേധാവി ആർ. ആനന്ദിനെ അറിയിച്ചു. തുടർന്ന് കേസെടുത്ത് അന്വേഷണം ആരംഭിച്ചു.
തട്ടിപ്പ് നടത്തിയ വ്യക്തിയെ കണ്ടെത്തുന്നതിനായി ആറന്മുള സി.ഐ. എം.ആർ. രാജേഷ് കുമാറിന്റെയും എസ്.എച്ച്.ഒ. ഉണ്ണികൃഷ്ണന്റെയും നേതൃത്വത്തിൽ പ്രത്യേക അന്വേഷണ സംഘം രൂപീകരിച്ചു.
പ്രതിയെന്ന് സംശയിക്കുന്നയാളുടെ ഫോൺ നമ്പർ, മേൽവിലാസം, ബാങ്ക് അക്കൗണ്ട് വിവരങ്ങൾ തുടങ്ങിയവ പോലീസ് ശേഖരിച്ചിട്ടുണ്ട്. പ്രതിയെ ഉടൻ പിടികൂടാൻ കഴിയുമെന്നാണ് പോലീസ് വ്യക്തമാക്കുന്നത്.
