ന്യൂഡല്‍ഹി: രാജ്യത്തെ തദ്ദേശീയ പ്രതിരോധ നിര്‍മാണ ശേഷി കൂടുതല്‍ വിപുലീകരിക്കുന്നതിന്റെ ഭാഗമായി മിസൈല്‍, ബോംബ് ആയുധ സംവിധാനങ്ങളുടെ വികസനത്തിലും നിര്‍മാണത്തിലും പങ്കാളികളാകാന്‍ ആഭ്യന്തര സ്വകാര്യ കമ്പനികളെ ക്ഷണിച്ച് പ്രതിരോധ ഗവേഷണ വികസന സംഘടന. ഇതിനായി DRDO Expression of Interest (EoI) പുറത്തിറക്കി. മിസൈല്‍സ് ആന്‍ഡ് സ്ട്രാറ്റജിക് സിസ്റ്റംസ് ക്ലസ്റ്ററിന് കീഴിലുള്ള വിവിധ മിസൈല്‍/ബോംബ് ആയുധ പദ്ധതികള്‍ക്കായി Development-cum-Production Partners (DcPPs) ആയി പ്രവര്‍ത്തിക്കാന്‍ ശേഷിയുള്ള കമ്പനികളെ കണ്ടെത്തുകയാണ് ലക്ഷ്യം.
തിരഞ്ഞെടുക്കപ്പെടുന്ന കമ്പനികള്‍ ഡിആര്‍ഡിഒ നിശ്ചയിക്കുന്ന സാങ്കേതിക, നിര്‍മാണ, അടിസ്ഥാനസൗകര്യ മാനദണ്ഡങ്ങള്‍ പാലിക്കണം. തുടര്‍ന്ന് പദ്ധതികള്‍ക്ക് അനുസരിച്ചുള്ള Request for Proposal (RFP) നടപടികളിലേക്ക് ഇവരെ പരിഗണിക്കും. പങ്കാളികളാകുന്ന കമ്പനികള്‍ക്ക് ഡിആര്‍ഡിഒ പദ്ധതികളുടെ വികസനം, അസംബ്ലി, ഇന്റഗ്രേഷന്‍ തുടങ്ങിയ പ്രവര്‍ത്തനങ്ങളില്‍ പങ്കെടുക്കാനും ഡിആര്‍ഡിഒ രൂപകല്‍പ്പന ചെയ്ത് വികസിപ്പിച്ച ആയുധ സംവിധാനങ്ങളുടെ ഇന്റഗ്രേഷനും ക്വാളിഫിക്കേഷനും നടത്താനുള്ള ശേഷി വികസിപ്പിക്കാനും കഴിയും.
ഡിആര്‍ഡിഒ വികസനവും സൈനിക പരീക്ഷണങ്ങളും പൂര്‍ത്തിയാക്കിയ ശേഷം, ബന്ധപ്പെട്ട വിതരണ ശൃംഖലയുമായി സഹകരിച്ച് കരസേന, നാവികസേന, വ്യോമസേന എന്നിവയ്‌ക്കുള്ള ഉല്‍പ്പാദന ഓര്‍ഡറുകള്‍ നടപ്പാക്കാനും കമ്പനികള്‍ക്ക് അവസരം ലഭിക്കും. ആയുധങ്ങളുടെ ജീവിതചക്രത്തിനിടെ അപ്ഗ്രേഡുകളും ഇന്റഗ്രേറ്റഡ് ലോജിസ്റ്റിക്‌സ് പിന്തുണയും നല്‍കാനും അനുമതിയോടെ വ്യവസായ പങ്കാളികള്‍ക്ക് സാധിക്കും.
പങ്കാളിത്തത്തിനായി പരിഗണിക്കുന്ന കമ്പനികളുടെ 50 മുതല്‍ 100 യൂണിറ്റ് വരെ ബള്‍ക്ക് ഉല്‍പ്പാദനം കൈകാര്യം ചെയ്യാനുള്ള ശേഷി അടിസ്ഥാനസൗകര്യം, സാങ്കേതിക വൈദഗ്ധ്യം, മാനേജീരിയല്‍ ജീവനക്കാര്‍ എന്നിവയുടെ അടിസ്ഥാനത്തില്‍ വിലയിരുത്തും. EoL പ്രകാരം അപേക്ഷിക്കുന്ന കമ്പനിക്ക് കുറഞ്ഞത് 100 കോടി രൂപയുടെ വാര്‍ഷിക വിറ്റുവരവ് ഉണ്ടായിരിക്കണം. അഗ്‌നി, പൃഥ്വി, ആകാശ് മിസൈലുകള്‍, പിനാക മള്‍ട്ടി-ബാരല്‍ റോക്കറ്റ് ലോഞ്ചര്‍ തുടങ്ങിയ സംവിധാനങ്ങളെ പൊതുമേഖലാ-സ്വകാര്യ മേഖലാ പങ്കാളിത്തത്തിലൂടെ വലിയ തോതിലുള്ള ഉല്‍പ്പാദനത്തിലേക്ക് ഉഞഉഛ ഇതിനകം മാറ്റിയിട്ടുണ്ട്.
ആത്മനിര്‍ഭര്‍ ഭാരത് പദ്ധതിയുടെ ഭാഗമായി പ്രതിരോധ ഇറക്കുമതിയിലെ ആശ്രിതത്വം കുറച്ച് രാജ്യത്തിനകത്ത് തന്ത്രപ്രധാന ആയുധങ്ങള്‍ വലിയ തോതില്‍ നിര്‍മിക്കാനുള്ള ശേഷി വര്‍ധിപ്പിക്കുകയാണ് പുതിയ നീക്കത്തിന്റെ പ്രധാന ലക്ഷ്യം.
