ചെന്നൈ: കർഷകരുടെയും പ്രദേശവാസികളുടെയും ശക്തമായ പ്രതിഷേധത്തിന് പിന്നാലെ പരന്തൂർ വിമാനത്താവള പദ്ധതിയിൽ നിന്ന് തമിഴ്നാട് സർക്കാർ പിന്മാറി. നിയമസഭയിലാണ് മുഖ്യമന്ത്രി ജോസഫ് വിജയ് ഇക്കാര്യം പ്രഖ്യാപിച്ചത്.
പദ്ധതിയുടെ പേരിൽ കൃഷിഭൂമി ഏറ്റെടുക്കാനുള്ള മുൻ ഡിഎംകെ സർക്കാരിന്റെ നീക്കത്തെ മുഖ്യമന്ത്രി വിമർശിച്ചു. പുതിയ വിമാനത്താവളത്തിനായി ജനങ്ങളെ കുടിയൊഴിപ്പിക്കില്ലെന്നും കർഷകരുടെയും പ്രദേശവാസികളുടെയും ജീവനോപാധികൾ സംരക്ഷിക്കുമെന്നും ജോസഫ് വിജയ് വ്യക്തമാക്കി.
പകരം, മീനംബാക്കം വിമാനത്താവളത്തിൽ അഞ്ചാം ടെർമിനൽ നിർമിക്കാനും സർക്കാർ തീരുമാനിച്ചു. പരന്തൂരിന് പകരം പുതിയ വിമാനത്താവളത്തിനായി അനുയോജ്യമായ മറ്റൊരു സ്ഥലം കണ്ടെത്തുമെന്നും മുഖ്യമന്ത്രി അറിയിച്ചു. വിമാനത്താവള വികസനത്തിന്റെ പേരിൽ കർഷകരുടെ ഭൂമിയും ജീവിതവും നഷ്ടപ്പെടുത്തുന്ന സാഹചര്യം ഒഴിവാക്കുകയാണ് സർക്കാരിന്റെ ലക്ഷ്യമെന്നും മുഖ്യമന്ത്രി വ്യക്തമാക്കി.
