മുംബൈ: ടിക്കറ്റ് ബുക്കിങ് സമയത്തെ കടുത്ത തിരക്കും സര്വീസ് തടസ്സങ്ങളും ഒഴിവാക്കാന് ഐആര്സിടിസി വെബ്സൈറ്റും മൊബൈല് ആപ്പും അടിമുടി നവീകരിക്കുന്നു. സെര്വര് തകരാര് ഉള്പ്പെടെയുള്ള സാങ്കേതിക പ്രശ്നങ്ങള് പരിഹരിക്കുന്നതിനൊപ്പം ബുക്കിങ് കൂടുതല് വേഗത്തിലാക്കുന്നതിനുള്ള സംവിധാനങ്ങളാണ് പുതിയ പതിപ്പില് ഉള്പ്പെടുത്തുന്നത്. മാറ്റങ്ങള് ഇതിനകം ബീറ്റ പതിപ്പില് നടപ്പാക്കിയിട്ടുണ്ട്.
നെക്സ്റ്റ് ജനറേഷന് ഇ-ടിക്കറ്റിംഗ് പ്ലാറ്റ്ഫോമിന്റെ സെര്വര്, സ്റ്റോറേജ്, നെറ്റ്വര്ക്കിംഗ്, സോഫ്റ്റ്വെയര് സംവിധാനങ്ങള് നവീകരിക്കും. നിലവില് മിനിറ്റില് ഏകദേശം 37,000 ടിക്കറ്റുകള് ബുക്ക് ചെയ്യാന് കഴിയുമ്പോള്, നവീകരണത്തിന് ശേഷം ഇത് ഒരു ലക്ഷമായി ഉയര്ത്താനാണ് ലക്ഷ്യമിടുന്നത്. പദ്ധതിക്കായി ഏകദേശം 150 കോടി രൂപ അനുവദിച്ചിട്ടുണ്ട്. വെബ്സൈറ്റിന് അപ്രതീക്ഷിതമായി തടസ്സം നേരിടുന്നത് ഒഴിവാക്കാന് സെക്കന്തരാബാദില് പുതിയ ബാക്കപ്പ് ഡിസാസ്റ്റര് റിക്കവറി സംവിധാനം ഒരുക്കുന്നുണ്ട്.
പ്രധാന സെര്വറുകള്ക്ക് തകരാര് സംഭവിച്ചാലും ബദല് സംവിധാനത്തിലൂടെ ടിക്കറ്റ് ബുക്കിങ് തുടരാന് ഇതുവഴി സാധിക്കും. ടിക്കറ്റ് ബുക്ക് ചെയ്യുന്നതിനിടെ യാത്രക്കാര് നേരിടുന്ന ബുദ്ധിമുട്ടുകള് കുറയ്ക്കുന്നതിനായി അനാവശ്യമായ കാപ്ചകള്, പോപ്പ്-അപ്പുകള്, ഫ്ലാഷിംഗ് ഗ്രാഫിക്സ് എന്നിവ ഒഴിവാക്കും. എല്ലാ ക്ലാസുകളിലെയും സീറ്റ് ലഭ്യത ഒരൊറ്റ ഇടത്ത് പരിശോധിക്കാനുള്ള സൗകര്യവും പുതിയ സംവിധാനത്തിലുണ്ടാകും. യാത്രക്കാരുടെ വിവരങ്ങള് മുന്കൂട്ടി സേവ് ചെയ്യാനും കഴിയും. ഇതോടെ ഓരോ ബുക്കിങ്ങിനും വിവരങ്ങള് വീണ്ടും ടൈപ്പ് ചെയ്യേണ്ടിവരില്ല.
കുറഞ്ഞ ഘട്ടങ്ങളിലൂടെ വേഗത്തില് ടിക്കറ്റ് ബുക്ക് ചെയ്യാന് കഴിയുന്ന തരത്തിലാണ് പുതിയ വെബ്സൈറ്റും ആപ്പും രൂപകല്പ്പന ചെയ്യുന്നത്. റെയില്വേ മന്ത്രി അശ്വിനി വൈഷ്ണവ് മാളവ്യ നാഷണല് ഇന്സ്റ്റിറ്റ്യൂട്ട് ഓഫ് ടെക്നോളജിയിലെ വിദ്യാര്ഥികളുമായി നടത്തിയ കൂടിക്കാഴ്ചയില് ലഭിച്ച നിര്ദേശങ്ങളും പുതിയ സംവിധാനത്തിന്റെ രൂപകല്പ്പനയില് പരിഗണിച്ചിട്ടുണ്ട്.
