തിരുവനന്തപുരം: ലഹരി സംഘത്തെ പിടികൂടാനെത്തിയ ഡാന്സാഫ് സംഘത്തിലെ രണ്ട് പോലീസുകാരെ കാറിടിച്ച് കൊലപ്പെടുത്താന് ശ്രമം. ഡാന്സാഫ് സംഘാംഗങ്ങളായ വിനീത്, റോജിന് എന്നിവര്ക്കാണ് ആക്രമണത്തില് പരിക്കേറ്റത്. ഇരുവരെയും തിരുവനന്തപുരം മെഡിക്കല് കോളേജ് ആശുപത്രിയില് പ്രവേശിപ്പിച്ചു. വൈകുന്നേരം അഞ്ചുമണിയോടെ വലിയതുറ പോലീസ് സ്റ്റേഷന് പരിധിയിലാണ് സംഭവം. പോലീസ് ബൈക്കില് സഞ്ചരിക്കുകയായിരുന്ന ഇരുവരെയും ആള്ട്ടോ കാര് ഇടിച്ചുവീഴ്ത്തുകയായിരുന്നു.
കാര് മുന്നോട്ടെടുത്ത ശേഷം നിര്ത്തുകയും വീണ്ടും പിന്നോട്ടെടുത്ത് പോലീസുകാരുടെ ദേഹത്ത് ഇടിക്കുകയുമായിരുന്നുവെന്നാണ് പ്രാഥമിക വിവരം. റോജിന്റെ കാലിലൂടെ കാര് കയറിയിറങ്ങിയതായും റിപ്പോര്ട്ടുണ്ട്. കാറിലുണ്ടായിരുന്നത് ലഹരി സംഘാംഗങ്ങളാണെന്നാണ് പോലീസിന്റെ പ്രാഥമിക നിഗമനം. ആക്രമണത്തിന് ശേഷം കാറില് രക്ഷപ്പെട്ട പ്രതികളെ പോലീസ് തിരിച്ചറിഞ്ഞിട്ടുണ്ട്. സംഭവത്തില് കേസെടുത്ത പോലീസ് പ്രതികള്ക്കായി തിരച്ചില് ആരംഭിച്ചു. സംഭവത്തിന്റെ കൂടുതല് വിവരങ്ങള് പോലീസ് അന്വേഷിച്ചുവരികയാണ്.
