പത്തനംതിട്ട: പോപ്കോൺ, കോഫി എന്നിവയുടെ അളവിൽ കുറവ് കണ്ടെത്തിയതിനെ തുടർന്ന് പത്തനംതിട്ടയിലെ ധന്യ–രമ്യ സിനിമാ തിയേറ്റർ കോംപ്ലക്സിനെതിരെ ലീഗൽ മെട്രോളജി വിഭാഗം കേസെടുത്തു. ലീഗൽ മെട്രോളജി വിഭാഗവും സിവിൽ സപ്ലൈസ് വകുപ്പും സംയുക്തമായി നടത്തിയ പരിശോധനയിലാണ് അളവിലെ ക്രമക്കേട് കണ്ടെത്തിയത്.
മീഡിയം വിഭാഗമെന്ന പേരിൽ വിൽപ്പനയ്ക്ക് വച്ചിരുന്ന പോപ്കോൺ പാക്കറ്റിലാണ് ശ്രദ്ധേയമായ അളവുകുറവ് കണ്ടെത്തിയത്. പാക്കറ്റിൽ 70 ഗ്രാം എന്ന് രേഖപ്പെടുത്തിയിരുന്നെങ്കിലും പരിശോധനയിൽ ലഭിച്ചത് 51 ഗ്രാം മാത്രമാണ്. അതായത് രേഖപ്പെടുത്തിയ അളവിനെക്കാൾ 19 ഗ്രാം കുറവ്.
സ്മോൾ വിഭാഗം പോപ്കോൺ പാക്കറ്റിലും സമാനമായ അളവുകുറവ് കണ്ടെത്തി. 55 ഗ്രാം എന്ന് രേഖപ്പെടുത്തിയിരുന്ന പാക്കറ്റിൽ ഉണ്ടായിരുന്നത് 41 ഗ്രാം മാത്രമായിരുന്നു. ഇതിന് പുറമെ കോഫിയുടെ അളവിലും വലിയ വ്യത്യാസമാണ് പരിശോധനയിൽ കണ്ടെത്തിയത്.
180 മില്ലി എന്ന് രേഖപ്പെടുത്തി വിൽപ്പന നടത്തിയിരുന്ന കോഫിയിൽ യഥാർഥത്തിൽ ഉണ്ടായിരുന്നത് 105 മില്ലി മാത്രമാണ്. രേഖപ്പെടുത്തിയ അളവിനേക്കാൾ 75 മില്ലിയുടെ കുറവാണ് പരിശോധനയിൽ കണ്ടെത്തിയത്.
ഇതോടെയാണ് ധന്യ–രമ്യ സിനിമാ തിയേറ്റർ കോംപ്ലക്സിനെതിരെ ലീഗൽ മെട്രോളജി വിഭാഗം കേസ് രജിസ്റ്റർ ചെയ്തത്.
വിലനിലവാര ബോർഡും പരിശോധിച്ചു
തിയേറ്ററുകളിലെ വിൽപ്പനയും ഉപഭോക്താക്കൾക്ക് നൽകുന്ന സാധനങ്ങളുടെ അളവും സംബന്ധിച്ച പരിശോധനയുടെ ഭാഗമായാണ് നടപടി. അതേസമയം, വില നിലവാര ബോർഡ് സ്ഥാപിക്കാത്തതിന് ട്രിനിറ്റി തിയേറ്ററിന് ലീഗൽ മെട്രോളജി വിഭാഗം നോട്ടീസ് നൽകി.
പത്തനംതിട്ടയിലെ വിവിധ തിയേറ്ററുകളിലാണ് ലീഗൽ മെട്രോളജി വിഭാഗവും സിവിൽ സപ്ലൈസ് വകുപ്പും സംയുക്തമായി പരിശോധന നടത്തിയത്. തിയേറ്ററുകളിൽ ഭക്ഷ്യവസ്തുക്കളും പാനീയങ്ങളും വിൽക്കുമ്പോൾ പാക്കറ്റിലോ വിൽപ്പനയിലോ രേഖപ്പെടുത്തിയിരിക്കുന്ന അളവിനനുസരിച്ച് ഉപഭോക്താവിന് സാധനം ലഭിക്കുന്നുണ്ടോയെന്നും വില സംബന്ധിച്ച വിവരങ്ങൾ കൃത്യമായി പ്രദർശിപ്പിക്കുന്നുണ്ടോയെന്നും പരിശോധനയിൽ പരിശോധിച്ചു.
സിനിമാ തിയേറ്ററുകളിലെ ഭക്ഷണ-പാനീയ വിൽപ്പനയിൽ ഉപഭോക്താക്കൾക്ക് ലഭിക്കുന്ന അളവിനെക്കുറിച്ചുള്ള പരാതികൾ ഉയരുന്നതിനിടെയാണ് പത്തനംതിട്ടയിലെ പരിശോധനയിൽ പോപ്കോണിലും കോഫിയിലും അളവുകുറവ് കണ്ടെത്തിയത്.
