ന്യൂഡല്ഹി: ലോകത്തെ പ്രമുഖ വ്യോമസേനകളെ അണിനിരത്തി ഇന്ത്യന് വ്യോമസേനയുടെ (IAF) ബഹുരാഷ്ട്ര വ്യോമാഭ്യാസമായ ‘തരംഗ് ശക്തി 2026’ സെപ്റ്റംബര് 26ന് ആരംഭിക്കും. ഒക്ടോബര് 12 വരെ ജോധ്പൂര് എയര്ഫോഴ്സ് സ്റ്റേഷനിലാണ് രണ്ടാമത് ‘തരംഗ് ശക്തി’ നടക്കുന്നത്. അമേരിക്ക, ഫ്രാന്സ്, ജര്മനി, ഓസ്ട്രേലിയ, ബംഗ്ലാദേശ്, ശ്രീലങ്ക, യുഎഇ എന്നിവയുള്പ്പെടെ എട്ട് രാജ്യങ്ങളാണ് വ്യോമാഭ്യാസത്തില് പങ്കെടുക്കുക. 32 രാജ്യങ്ങള് നിരീക്ഷകരായും എത്തും.
ഇന്ത്യയുടെ വ്യോമശക്തി പ്രദര്ശിപ്പിക്കുന്നതിനൊപ്പം വിവിധ രാജ്യങ്ങളുടെ വ്യോമസേനകള്ക്ക് സംയുക്ത തന്ത്രപരമായ നീക്കങ്ങളിലൂടെ പരസ്പര പ്രവര്ത്തനക്ഷമത മെച്ചപ്പെടുത്താനുള്ള അവസരമാണ് ‘തരംഗ് ശക്തി’ നല്കുന്നത്. ഇന്ത്യയുടെ ഏറ്റവും വലിയ ബഹുരാഷ്ട്ര വ്യോമാഭ്യാസമായാണ് ഐഎഎഫ് ഇതിനെ വിശേഷിപ്പിക്കുന്നത്. ഈ വര്ഷത്തെ വ്യോമാഭ്യാസത്തിലെ പ്രധാന ആകര്ഷണം അമേരിക്കയുടെ എഫ്-35 സ്റ്റെല്ത്ത് യുദ്ധവിമാനങ്ങളുടെ പങ്കാളിത്തമാണ്. ആറ് എഫ്-35 വിമാനങ്ങളും രണ്ട് കെസി-135 എയര്-ടു-എയര് റീഫ്യൂവലിങ് വിമാനങ്ങളുമാണ് അമേരിക്ക പ്രതീക്ഷിക്കുന്നത്.
ഫ്രാന്സ് ഏഴ് റഫാല് യുദ്ധവിമാനങ്ങള്, മൂന്ന് എ400എം ട്രാന്സ്പോര്ട്ട് വിമാനങ്ങള്, രണ്ട് എംആര്ടിടി വിമാനങ്ങള് എന്നിവയുമായി പങ്കെടുക്കും. യുഎഇ ആറ് എഫ്-16 വിമാനങ്ങളും ഒരു ഗ്ലോബല് 6000 വിമാനവും വിന്യസിക്കും. ജര്മനി രണ്ട് എ400എം വിമാനങ്ങളുമായി എത്തും. ഓസ്ട്രേലിയയും ബംഗ്ലാദേശും ഓരോ സി-130 വിമാനവുമായി പങ്കെടുക്കുമ്പോള് ശ്രീലങ്ക കിംഗ് എയര് 350 വിമാനത്തെ വിന്യസിക്കും.
എഫ്-35 മുമ്പ് ഇന്ത്യ സന്ദര്ശിച്ചിട്ടുണ്ടെങ്കിലും, ഇത്തരമൊരു ബഹുരാഷ്ട്ര വ്യോമാഭ്യാസത്തില് ഇന്ത്യ എഫ്-35നെ ഉള്പ്പെടുത്തുന്നത് ആദ്യമായാണെന്ന് എയര് മാര്ഷല് ആശുതോഷ് ദീക്ഷിത് വ്യക്തമാക്കി. ആതിഥേയ രാജ്യമായ ഇന്ത്യയും തങ്ങളുടെ മുന്നിര യുദ്ധവിമാനങ്ങളെ അഭ്യാസത്തിനായി അണിനിരത്തും. റഫാല്, മിറാഷ്-2000, ജാഗ്വാര്, തേജസ്, മിഗ്-29, സുഖോയ്-30 എംകെഐ തുടങ്ങിയ വിമാനങ്ങള് വിവിധ ദൗത്യങ്ങളില് പങ്കെടുക്കും.
പങ്കെടുക്കുന്ന രാജ്യങ്ങളുടെ വ്യോമസേനകള് സംയുക്ത തന്ത്രപരമായ നീക്കങ്ങള് നടത്തുകയും വിവിധ പ്രവര്ത്തനരീതികള് പരസ്പരം മനസിലാക്കുകയും ചെയ്യും. ഇതിലൂടെ സങ്കീര്ണമായ ബഹുരാഷ്ട്ര സാഹചര്യങ്ങളില് ഒരുമിച്ച് പ്രവര്ത്തിക്കുന്നതിനുള്ള ശേഷി മെച്ചപ്പെടുത്തുകയാണ് ലക്ഷ്യം. ഇന്ത്യന് വ്യോമസേനയുടെ തേജസ്, സുഖോയ്-30 എംകെഐ, റഫാല് തുടങ്ങിയ വിമാനങ്ങള് അടുത്തിടെ ജോധ്പൂരില് നടന്ന ‘വീര് ഗാര്ഡിയന്-2026’ ഇന്ത്യ-ജപ്പാന് വ്യോമാഭ്യാസത്തിലും പങ്കെടുത്തിരുന്നു.
ഇന്ത്യയ്ക്ക് പുറമെ അമേരിക്ക, ഫ്രാന്സ്, ജര്മനി, ഓസ്ട്രേലിയ, ബംഗ്ലാദേശ്, ശ്രീലങ്ക, യുഎഇ എന്നിവയാണ് വ്യോമാഭ്യാസത്തില് വ്യോമ ആസ്തികളുമായി പങ്കെടുക്കുന്നത്. 32 രാജ്യങ്ങളുടെ പ്രതിനിധികള് നിരീക്ഷകരായെത്തും.
