നഗോയ: ഏഷ്യന് ഗെയിംസിലെ പുരുഷ ഹോക്കിയില് ഗോള്മഴ പെയ്യിച്ച് ഇന്ത്യ. പൂള് എയിലെ രണ്ടാം മത്സരത്തില് ശ്രീലങ്കയെ 16-1ന് തകര്ത്താണ് ഇന്ത്യ വമ്പന് ജയം സ്വന്തമാക്കിയത്. ജുഗ്രാജ് സിങ് നാല് ഗോളുമായി തിളങ്ങിയപ്പോള് അഭിഷേകും ദില്പ്രീത് സിങ്ങും ഹാട്രിക് നേടി. ഏഷ്യന് ഗെയിംസിലെ ഇന്ത്യയുടെ തുടര്ച്ചയായ രണ്ടാം ജയമാണിത്. നേരത്തെ ആദ്യ മത്സരത്തില് ഇന്തോനേഷ്യയെ 13-1ന് ഇന്ത്യ തോല്പ്പിച്ചിരുന്നു.
മത്സരത്തിന്റെ അഞ്ചാം മിനിറ്റില് തന്നെ ഇന്ത്യ ഗോള്വേട്ടയ്ക്ക് തുടക്കമിട്ടു. മന്ദീപ് സിങ്ങാണ് ഇന്ത്യയുടെ ആദ്യ ഗോള് നേടിയത്. പിന്നാലെ 10-ാം മിനിറ്റില് ജുഗ്രാജ് സിങ്ങും 11-ാം മിനിറ്റില് അഭിഷേക് നൈനും ലക്ഷ്യം കണ്ടു. ഇതോടെ ആദ്യ ക്വാര്ട്ടര് അവസാനിക്കുമ്പോള് ഇന്ത്യ 3-0ന് മുന്നിലെത്തി. രണ്ടാം ക്വാര്ട്ടറില് ഇന്ത്യ ആക്രമണം കൂടുതല് ശക്തമാക്കി. ക്യാപ്റ്റന് ഹര്മന്പ്രീത് സിങ് ഇന്ത്യയുടെ നാലാം ഗോള് നേടി. പിന്നാലെ അഭിഷേകും ജുഗ്രാജും മത്സരത്തിലെ തങ്ങളുടെ രണ്ടാം ഗോളുകള് കണ്ടെത്തി.
17-ാം മിനിറ്റില് അഭിഷേകും 22-ാം മിനിറ്റില് ജുഗ്രാജുമാണ് വലകുലുക്കിയത്. തുടര്ന്ന് സുഖ്ജീത് സിങ്ങും ദില്പ്രീത് സിങ്ങും ഗോള് നേടിയതോടെ ആദ്യ പകുതി അവസാനിക്കുമ്പോള് ഇന്ത്യ 8-0ന് മുന്നിലെത്തി. ഇന്ത്യന് മുന്നേറ്റനിരയുടെ തുടര്ച്ചയായ ആക്രമണങ്ങള്ക്ക് മുന്നില് ശ്രീലങ്കയ്ക്ക് കാര്യമായ പ്രതിരോധം തീര്ക്കാനായില്ല. മൂന്നാം ക്വാര്ട്ടറിലും ഇന്ത്യ ഗോള്വേട്ട തുടര്ന്നു. മന്പ്രീത് സിങ്ങാണ് ക്വാര്ട്ടറിലെ ആദ്യ ഗോള് നേടിയത്. 36-ാം മിനിറ്റില് വിവേക് സാഗര് പ്രസാദും 38-ാം മിനിറ്റില് ദില്പ്രീത് സിങ്ങും ഗോള് നേടി.
42-ാം മിനിറ്റില് വീണ്ടും ലക്ഷ്യം കണ്ട ജുഗ്രാജ് ഹാട്രിക് പൂര്ത്തിയാക്കി. പിന്നാലെ ഹര്മന്പ്രീത് സിങ് മത്സരത്തിലെ രണ്ടാം ഗോള് നേടിയതോടെ ഇന്ത്യ 13-0ന്റെ വന് ലീഡിലെത്തി. നാലാം ക്വാര്ട്ടറിലും ഇന്ത്യയുടെ ആക്രമണത്തിന് കുറവുണ്ടായില്ല. അഭിഷേകും ദില്പ്രീതും തങ്ങളുടെ ഹാട്രിക് പൂര്ത്തിയാക്കി. ജുഗ്രാജ് സിങ് മത്സരത്തിലെ നാലാം ഗോളും കണ്ടെത്തി. ശ്രീലങ്കയ്ക്കായി സുരേഷ് രത്നായകെയാണ് ആശ്വാസഗോള് നേടിയത്. ഒടുവില് 16-1ന്റെ വമ്പന് ജയവുമായി ഇന്ത്യ മത്സരം പൂര്ത്തിയാക്കി. തുടര്ച്ചയായ രണ്ട് മത്സരങ്ങളില് 29 ഗോളുകളാണ് ഇന്ത്യ ഇതോടെ നേടിയത്. ഏഷ്യന് ഗെയിംസിലെ നിലവിലെ ചാമ്പ്യന്മാരായ ഇന്ത്യ കിരീടം നിലനിര്ത്താനുള്ള പോരാട്ടത്തിലാണ്.
2026 ഏഷ്യന് ഗെയിംസില് പുരുഷ ഹോക്കി സ്വര്ണം നേടുന്ന ടീമിന് 2028 ലെ ലോസ് ആഞ്ചലസ് ഒളിമ്പിക്സിലേക്ക് നേരിട്ടുള്ള യോഗ്യതയും ലഭിക്കും.
