വാഷിങ്ടണ്: യുഎന് പൊതുസഭയുടെ 81-ാം സമ്മേളനത്തിനായി ന്യൂയോര്ക്കിലെത്തിയ ഇറാന് പ്രതിനിധികളുമായി കൂടിക്കാഴ്ച നടത്താന് യുഎസ് പ്രസിഡന്റ് ഡോണള്ഡ് ട്രംപ് താല്പര്യം പ്രകടിപ്പിച്ചതായി റിപ്പോര്ട്ട്. സാഹചര്യം അനുകൂലമാണെങ്കില് ഇറാന് ഉദ്യോഗസ്ഥരുമായി ചര്ച്ച നടത്തുന്നതിനെക്കുറിച്ച് ഉപദേശകരോട് ട്രംപ് സംസാരിച്ചതായാണ് വിവരം. എന്നാല് ഇതുവരെ ഔദ്യോഗിക കൂടിക്കാഴ്ച തീരുമാനിച്ചിട്ടില്ല. ഇറാനുമായുള്ള യുദ്ധം അവസാനിപ്പിക്കുന്നതിനുള്ള നയതന്ത്ര മാര്ഗം കണ്ടെത്തുന്നതില് ഇത്തരമൊരു കൂടിക്കാഴ്ച പ്രയോജനപ്പെടുമോയെന്നതിലാണ് യുഎസ് ഭരണകൂടത്തിലെ ചര്ച്ചകള്.
ന്യൂയോര്ക്കിലുള്ള ഇറാന് പ്രതിനിധികള്ക്ക് പരമോന്നത നേതാവ് ആയത്തുല്ല മൊജ്തബ ഖമനയിയുടെ പിന്തുണയുണ്ടോയെന്ന കാര്യത്തിലും യുഎസ് ഉദ്യോഗസ്ഥര്ക്കിടയില് സംശയമുണ്ടെന്നാണ് റിപ്പോര്ട്ട്. യുഎന് പൊതുസഭയ്ക്കായി ഇറാന്റെ പരിമിത സംഘത്തില് വിദേശകാര്യ മന്ത്രി അബ്ബാസ് അരാഗ്ചിയും പ്രസിഡന്റ് മസൂദ് പെസെഷ്കിയാനും ഉള്പ്പെടുന്നുണ്ട്. ട്രംപും പെസെഷ്കിയാനും ന്യൂയോര്ക്കില് ഒരേ സമയം ഉണ്ടായിരിക്കുമെങ്കിലും ഇരുവരും തമ്മിലുള്ള നേരിട്ടുള്ള കൂടിക്കാഴ്ചയ്ക്ക് ഇതുവരെ ഔദ്യോഗിക സ്ഥിരീകരണമില്ല.
ഇറാന് പ്രതിനിധികളുമായി ചര്ച്ച നടത്താന് യുഎസ് തയ്യാറാണെന്ന് സ്റ്റേറ്റ് സെക്രട്ടറി മാര്ക്കോ റൂബിയോ വ്യക്തമാക്കി. എന്നാല് കൂടിക്കാഴ്ചയ്ക്ക് നിലവില് ഔദ്യോഗിക ഷെഡ്യൂള് തയ്യാറാക്കിയിട്ടില്ലെന്നും അദ്ദേഹം പറഞ്ഞു. ഇത്തരമൊരു കൂടിക്കാഴ്ചയില്നിന്ന് ക്രിയാത്മകമായ ഫലം പ്രതീക്ഷിക്കാനാകുമെങ്കില് ചര്ച്ചയ്ക്ക് യുഎസ് തയ്യാറാണെന്നാണ് റൂബിയോയുടെ നിലപാട്. ഇറാന് ആണവായുധം സ്വന്തമാക്കുന്നത് തടയുക എന്നതാണ് നയതന്ത്ര ഇടപെടലുകളുടെ പ്രധാന ലക്ഷ്യമെന്നും അദ്ദേഹം വ്യക്തമാക്കി.
യുഎന്നിലെ യുഎസ് അംബാസഡര് മൈക്ക് വാള്ട്ട്സും ഇറാനുമായി നേരിട്ടുള്ള ചര്ച്ചയ്ക്കുള്ള സാധ്യത തള്ളിക്കളഞ്ഞിട്ടില്ല. എന്നാല് ഇറാന് ഭാഗത്തുനിന്ന് കൂടിക്കാഴ്ചയ്ക്ക് തയ്യാറാണോ എന്നതാണ് പ്രധാന ചോദ്യമെന്നും അദ്ദേഹം ചൂണ്ടിക്കാട്ടി. അതേസമയം, യുഎന് പൊതുസഭയ്ക്കിടെ നയതന്ത്ര ചര്ച്ചകള് പുനരാരംഭിക്കാനുള്ള സാധ്യതയെക്കുറിച്ച് ഇറാന്റെ ഭാഗത്തുനിന്നും സൂചനകളുണ്ട്. യുഎസ് സൈനിക സമ്മര്ദം കുറയ്ക്കുകയും ഇറാന് തുറമുഖങ്ങളിലെ ഉപരോധം നീക്കുകയും ചെയ്താല് ഹോര്മുസ് കടലിടുക്ക് ഒരാഴ്ചയ്ക്കുള്ളില് വീണ്ടും തുറക്കാന് തയ്യാറാണെന്ന് ഇറാന് വ്യക്തമാക്കിയതായി റോയിട്ടേഴ്സ് റിപ്പോര്ട്ട് ചെയ്തു. ന്യൂയോര്ക്കിലെത്തിയ ഇറാന് പ്രതിനിധി സംഘത്തിന് ചര്ച്ചകള് നടത്താനുള്ള പൂര്ണ അധികാരമുണ്ടെന്നും റിപ്പോര്ട്ടുണ്ട്.
