കശ്മീര്‍ വിഷയത്തില്‍ ഒഐസി നീക്കം; ‘ഇന്ത്യയുടെ ആഭ്യന്തര കാര്യത്തില്‍ ഇടപെടേണ്ട’താക്കീതുമായി കേന്ദ്രം

ന്യൂഡല്‍ഹി: ജമ്മു കശ്മീര്‍ വിഷയത്തില്‍ ഓര്‍ഗനൈസേഷന്‍ ഓഫ് ഇസ്ലാമിക് കോ-ഓപ്പറേഷന്റെ നിലപാടിനെതിരെ ശക്തമായ പ്രതികരണവുമായി ഇന്ത്യ. ഒഐസി കോണ്‍ടാക്ട് ഗ്രൂപ്പിന്റെ സംയുക്ത പ്രസ്താവനയില്‍ ഇന്ത്യയെക്കുറിച്ച് നടത്തിയ പരാമര്‍ശങ്ങള്‍ അനാവശ്യവും വസ്തുതാവിരുദ്ധവുമാണെന്ന് വിദേശകാര്യ മന്ത്രാലയം വ്യക്തമാക്കി. ജമ്മു കശ്മീര്‍ വിഷയത്തില്‍ പ്രതികരിക്കാന്‍ ഒഐസിയ്‌ക്ക് യാതൊരു അധികാരപരിധിയുമില്ലെന്നും ഇത് ഇന്ത്യയുടെ ആഭ്യന്തര വിഷയമാണെന്നും വിദേശകാര്യ മന്ത്രാലയം പ്രസ്താവനയില്‍ വ്യക്തമാക്കി.

ജമ്മു കശ്മീര്‍, ലഡാക്ക് എന്നീ കേന്ദ്രഭരണ പ്രദേശങ്ങള്‍ ഇന്ത്യയുടെ അവിഭാജ്യവും വേര്‍പെടുത്താനാകാത്തതുമായ ഭാഗങ്ങളാണെന്ന് വിദേശകാര്യ മന്ത്രാലയം വ്യക്തമാക്കി. രാഷ്‌ട്രീയ ലക്ഷ്യത്തോടെയുള്ള പ്രചാരണം എത്ര തവണ ആവര്‍ത്തിച്ചാലും ഈ യാഥാര്‍ഥ്യത്തില്‍ മാറ്റമുണ്ടാകില്ലെന്നും കേന്ദ്രം വ്യക്തമാക്കി. ഇന്ത്യയ്‌ക്കെതിരായ ഇത്തരം രാഷ്‌ട്രീയ പ്രചാരണങ്ങള്‍ക്ക് ഒഐസി തുടര്‍ച്ചയായി പിന്തുണ നല്‍കുന്നത് സംഘടനയുടെ വിശ്വാസ്യതയെക്കുറിച്ച് ഗുരുതരമായ ചോദ്യങ്ങള്‍ ഉയര്‍ത്തുന്നതായും വിദേശകാര്യ മന്ത്രാലയം ചൂണ്ടിക്കാട്ടി.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

ഇന്ത്യയ്‌ക്കെതിരായ ആരോപണങ്ങള്‍ ഉന്നയിക്കാന്‍ പാകിസ്താന് വേദിയൊരുക്കുന്നതിന് പകരം, പാകിസ്താനെ സ്വന്തം കാര്യങ്ങള്‍ പരിശോധിക്കാന്‍ ഉപദേശിക്കണമെന്നാണ് ഒഐസിയോട് ഇന്ത്യ ആവശ്യപ്പെട്ടത്. ഭീകരവാദത്തെ പിന്തുണയ്‌ക്കുകയും പ്രോത്സാഹിപ്പിക്കുകയും ചെയ്തതിന്റെ രേഖകളുള്ള രാജ്യമാണ് പാകിസ്താനെന്ന് വിദേശകാര്യ മന്ത്രാലയം ആരോപിച്ചു. പാകിസ്താന്റെ നിയന്ത്രണത്തിലുള്ള പ്രദേശങ്ങളില്‍ നിന്ന് ഉയരുന്ന ഭീകരവാദ ഭീഷണി നേരിടുന്നതിലാണ് രാജ്യം ശ്രദ്ധ കേന്ദ്രീകരിക്കേണ്ടതെന്നും ഇന്ത്യ വ്യക്തമാക്കി.

ജമ്മു കശ്മീര്‍ വിഷയത്തില്‍ പാകിസ്താന്‍ മുന്നോട്ടുവയ്‌ക്കുന്ന ”കെട്ടിച്ചമച്ചതും രാഷ്‌ട്രീയ പ്രേരിതവുമായ പ്രചാരണങ്ങള്‍ക്ക്” ഒഐസി ആവര്‍ത്തിച്ച് പിന്തുണ നല്‍കുന്നതിനെതിരെയാണ് ഇന്ത്യയുടെ ശക്തമായ പ്രതികരണം.