‘അനുമതിയുണ്ടായിരുന്നു’ എന്ന വാദം പൊളിയുന്നു? കെ.എം. ഷാജിയുടെ ആഡംബര കാര്‍ ഉപയോഗത്തില്‍ പുതിയ രേഖകള്‍

തിരുവനന്തപുരം: തദ്ദേശമന്ത്രി കെ.എം. ഷാജി ഔദ്യോഗിക ആവശ്യങ്ങള്‍ക്ക് സുഹൃത്തിന്റെ ആഡംബര കാര്‍ ഉപയോഗിച്ച സംഭവത്തില്‍ സര്‍ക്കാരിന്റെ വിശദീകരണത്തില്‍ കൂടുതല്‍ ചോദ്യങ്ങളുയരുന്നു. സര്‍ക്കാര്‍ വാഹനത്തിന് പകരം സ്വകാര്യ വാഹനം ഉപയോഗിക്കാന്‍ മന്ത്രിക്ക് അനുമതിയുണ്ടായിരുന്നുവെന്ന വാദമാണ് ഇപ്പോള്‍ ലഭ്യമായ രേഖകള്‍ ചോദ്യം ചെയ്യുന്നത്. കെ.എം. ഷാജിയുടെ രണ്ട് ദിവസത്തെ കൂര്‍ഗ് യാത്രയ്‌ക്ക് മാത്രമാണ് സ്വകാര്യ വാഹനം ഉപയോഗിക്കാന്‍ സര്‍ക്കാര്‍ അനുമതി നല്‍കിയിരുന്നതെന്നാണ് പുറത്തുവരുന്ന രേഖകളിലെ വിവരം. ഓഗസ്റ്റ് 16, 17 തീയതികളിലായിരുന്നു ഈ അനുമതി.

എന്നാല്‍, ഈ അനുമതിയുടെ മറവില്‍ മൂന്നാഴ്ചയിലേറെ സ്വകാര്യ വാഹനം ഉപയോഗിച്ചുവെന്നാണ് ആരോപണം. ഇതോടെ മന്ത്രിയുടെ വാഹന ഉപയോഗവുമായി ബന്ധപ്പെട്ട് സര്‍ക്കാര്‍ തലത്തില്‍ തന്നെ കൂടുതല്‍ വ്യക്തത ആവശ്യമാകുകയാണ്. സ്വകാര്യ വാഹനം ഉപയോഗിക്കാന്‍ സര്‍ക്കാര്‍ അനുമതി നല്‍കിയ മന്ത്രിമാരുടെ പട്ടികയിലും കെ.എം. ഷാജിയുടെ പേര് ഇല്ലെന്നാണ് റിപ്പോര്‍ട്ട്. രമേശ് ചെന്നിത്തല, പി.കെ. കുഞ്ഞാലിക്കുട്ടി, അബ്ദുള്‍ ഗഫൂര്‍ എന്നീ മൂന്ന് മന്ത്രിമാര്‍ക്കാണ് സ്വകാര്യ വാഹനം ഉപയോഗിക്കാന്‍ അനുമതി നല്‍കിയിട്ടുള്ളതെന്നാണ് രേഖകളില്‍ പറയുന്നത്.

ഇവര്‍ ഉപയോഗിച്ചത് സ്വന്തം വാഹനങ്ങളായിരുന്നുവെന്നതാണ് ഇതിലെ പ്രധാന വ്യത്യാസം. എന്നാല്‍ കെ.എം. ഷാജി ഉപയോഗിച്ചത് കണ്ണൂര്‍ തില്ലങ്കേരി സ്വദേശി യാക്കൂബിന്റെ കാറാണെന്നാണ് പുറത്തുവന്ന വിവരം. വാഹന ഉപയോഗം സംബന്ധിച്ച് വിവാദം ശക്തമായതോടെ കാര്‍ പിന്നീട് ഉടമയ്‌ക്ക് തിരിച്ചുനല്‍കുകയും ചെയ്തു. വാഹന വിവാദത്തില്‍ കെ.എം. ഷാജി നേരത്തെ വിശദീകരണവുമായി രംഗത്തെത്തിയിരുന്നു. വര്‍ഷങ്ങളായി താന്‍ ഈ വാഹനം ഉപയോഗിക്കുന്നുണ്ടെന്നും തനിക്ക് നിരവധി സൗഹൃദങ്ങളുണ്ടെന്നും സുഹൃത്തുക്കളില്‍ പലര്‍ക്കും മുന്തിയ വാഹനങ്ങളുണ്ടെന്നുമായിരുന്നു മന്ത്രിയുടെ വാദം.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

നടപടിക്രമങ്ങള്‍ പാലിച്ചാണ് വാഹനം ഉപയോഗിച്ചതെന്നും മന്ത്രി വ്യക്തമാക്കിയിരുന്നു. താന്‍ സഞ്ചരിക്കുന്ന വാഹനം നിയമപരമായി നിരത്തിലിറക്കാന്‍ യോഗ്യമാണെങ്കില്‍ അത് ഉപയോഗിക്കുന്നതില്‍ തെറ്റില്ലെന്ന നിലപാടും കെ.എം. ഷാജി ഫെയ്‌സ്ബുക്ക് കുറിപ്പിലൂടെ വ്യക്തമാക്കിയിരുന്നു. എന്നാല്‍ രണ്ട് ദിവസത്തേക്കുള്ള സര്‍ക്കാര്‍ അനുമതി മാത്രമാണ് ഉണ്ടായിരുന്നതെങ്കില്‍ പിന്നീട് മൂന്നാഴ്ചയിലേറെ വാഹനം ഉപയോഗിച്ചതെങ്ങനെ, എന്ന ചോദ്യമാണ് ഇപ്പോള്‍ ഉയരുന്നത്. മന്ത്രിയുടെ വാഹന ഉപയോഗവുമായി ബന്ധപ്പെട്ട രേഖകളും സര്‍ക്കാര്‍ നല്‍കിയ അനുമതിയുടെ പരിധിയും തമ്മിലുള്ള വ്യത്യാസത്തില്‍ വ്യക്തത വരുത്തേണ്ട സാഹചര്യമാണുള്ളത്. വാഹനം ഉപയോഗിച്ചതുമായി ബന്ധപ്പെട്ട നടപടിക്രമങ്ങള്‍ പാലിച്ചിട്ടുണ്ടോയെന്നതിലും സര്‍ക്കാര്‍ വിശദീകരണം നിര്‍ണായകമാകും.