കണ്ണൂർ: യുവാവിനെ തട്ടിക്കൊണ്ടുപോയി പണവും മൊബൈൽ ഫോണും കവർന്ന കേസിൽ എട്ടു വർഷത്തിനുശേഷം പ്രതി പിടിയിൽ. കണ്ണൂർ ശ്രീകണ്ടാപുരം സ്വദേശി ബൻസീറാണ് പോലീസ് പിടിയിലായത്.
2018 ഫെബ്രുവരിയിലായിരുന്നു കേസിനാസ്പദമായ സംഭവം.കണ്ണൂർ നഗരത്തിലെത്തിയ യുവാവിനെ പ്രതിയും സംഘവും തട്ടിക്കൊണ്ടുപോകുകയും, തുടർന്ന് അയാളുടെ കൈവശമുണ്ടായിരുന്ന പണവും ഫോണും കവർച്ച ചെയ്ത ശേഷം റെയിൽവേ സ്റ്റേഷൻ പരിസരത്ത് ഇറക്കിവിടുകയുമായിരുന്നു. സംഭവത്തിൽ ഇരയായ യുവാവ് നൽകിയ പരാതിയുടെ അടിസ്ഥാനത്തിലാണ് പോലീസ് കേസെടുത്തിക്കുന്നത്.
തനിക്കെതിരെ കേസെടുത്ത വിവരം അറിഞ്ഞ ഉടൻ തന്നെ ബൻസീർ വിദേശത്തേക്ക് കടന്നുകളയുകയായിരുന്നു. വർഷങ്ങളായി വിദേശത്തുണ്ടായിരുന്ന ഇയാൾ അടുത്തിടെ നാട്ടിൽ തിരിച്ചെത്തിയതായി പോലീസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതി പോലീസ് പിടിയിലായത്.
