മലപ്പുറത്ത് അഞ്ചാംപനി ബാധിച്ച് കുട്ടികളുടെ മരണം; മൂന്നിലൊന്ന് കുട്ടികൾക്കും രണ്ട് ഡോസ് ലഭിച്ചിട്ടില്ല; ആരോഗ്യ വകുപ്പിന്റെ ഗുരുതര വീഴ്ച; ബാലാവകാശ കമ്മീഷൻ സ്വമേധയാ കേസെടുത്തു

മലപ്പുറം: ജില്ലയിൽ അഞ്ചാംപനി ബാധിച്ച് കുട്ടികൾ മരിച്ച സംഭവത്തിൽ സംസ്ഥാന ബാലാവകാശ കമ്മീഷൻ സ്വമേധയാ കേസെടുത്തു. സംഭവത്തിൽ പ്രതിരോധ കുത്തിവയ്പ് ലഭിച്ചിരുന്നോയെന്നും വാക്സിനേഷൻ സംബന്ധിച്ച വീഴ്ചകൾ ഉണ്ടായിട്ടുണ്ടോയെന്നും ഉൾപ്പെടെയുള്ള കാര്യങ്ങൾ കമ്മീഷൻ പരിശോധിക്കും.

വളവന്നൂരിൽ 10 മാസം പ്രായമുള്ള കുഞ്ഞും പൊന്മളയിൽ ഒന്നര വയസുകാരനുമാണ് അഞ്ചാംപനി ബാധിച്ച് മരിച്ചത്. സംഭവത്തിൽ ശിശുക്ഷേമ വകുപ്പിനോടും ജില്ലാ മെഡിക്കൽ ഓഫീസറോടും കമ്മീഷൻ വിശദമായ റിപ്പോർട്ട് തേടി. 15 ദിവസത്തിനകം റിപ്പോർട്ട് സമർപ്പിക്കണമെന്നാണ് നിർദേശം.

വാക്സിനേഷൻ നില പരിശോധിക്കും
കുട്ടികൾക്ക് കൃത്യസമയത്ത് പ്രതിരോധ കുത്തിവയ്പുകൾ ലഭിച്ചിരുന്നോയെന്നും വാക്സിനേഷൻ സംബന്ധിച്ച ആരോഗ്യവകുപ്പിന്റെ നിർദേശങ്ങൾ പാലിച്ചിരുന്നോയെന്നും പരിശോധിക്കും. വാക്സിനേഷനോട് വിമുഖത കാണിക്കുന്ന പ്രദേശങ്ങളോ വിഭാഗങ്ങളോ ഉണ്ടെങ്കിൽ അതിന്റെ കാരണങ്ങളും അധികൃതർ പരിശോധിക്കുന്നുണ്ട്.

മൂന്നിലൊന്ന് കുട്ടികൾക്കും രണ്ട് ഡോസ് ലഭിച്ചിട്ടില്ല
ആരോഗ്യവകുപ്പിന്റെ പുതിയ കണക്കുകൾ പ്രകാരം, കഴിഞ്ഞ മൂന്ന് വർഷമായി മലപ്പുറം ജില്ലയിൽ ഏകദേശം മൂന്നിലൊന്ന് കുട്ടികൾക്കും അഞ്ചാംപനിക്കെതിരായ രണ്ട് ഡോസ് പ്രതിരോധ കുത്തിവയ്പ് പൂർണമായി ലഭിച്ചിട്ടില്ല. വളവന്നൂർ, കുറ്റിപ്പുറം, വേങ്ങര, പൂക്കോട്ടൂർ മേഖലകളിലാണ് രോഗവ്യാപനം കൂടുതലായി റിപ്പോർട്ട് ചെയ്യുന്നത്.

2025–26ൽ 63 ശതമാനം കുട്ടികൾക്കാണ് രണ്ട് ഡോസുകളും ലഭിച്ചത്. 2024–25ൽ ഇത് 61 ശതമാനവും 2023–24ൽ 63 ശതമാനവുമായിരുന്നു. വേങ്ങര, താനൂർ, മലപ്പുറം, അരീക്കോട് ബ്ലോക്ക് പഞ്ചായത്ത് മേഖലകളിൽ രണ്ട് ഡോസുകളും ലഭിക്കാത്ത കുട്ടികളുടെ എണ്ണം 40 ശതമാനത്തിലേറെയാണ്.

രോഗവ്യാപനം തടയാൻ വാക്സിനേഷൻ ക്യാമ്പുകൾ
മലപ്പുറം ജില്ലയിൽ ഈ വർഷം ഇതുവരെ 63 പേർക്ക് അഞ്ചാംപനി സ്ഥിരീകരിച്ചതായും 400ലേറെ പേർക്ക് രോഗബാധ സംശയിക്കുന്നതായും ആരോഗ്യവകുപ്പ് നേരത്തെ അറിയിച്ചിരുന്നു. വളവന്നൂർ ആരോഗ്യ ബ്ലോക്കിലാണ് രോഗബാധ കൂടുതലായി റിപ്പോർട്ട് ചെയ്തത്. വാക്സിനേഷൻ ക്യാമ്പുകളും ബോധവത്കരണ പ്രവർത്തനങ്ങളും മേഖലയിൽ ശക്തമാക്കിയിട്ടുണ്ട്.

അഞ്ചാംപനി അതിവേഗം പകരുന്ന വൈറസ് രോഗമാണ്. പനി, ജലദോഷം, കണ്ണിന് ചുവപ്പ് എന്നിവയ്‌ക്ക് പിന്നാലെ ശരീരത്തിൽ ചുവന്ന പാടുകൾ പ്രത്യക്ഷപ്പെടുന്നതാണ് പ്രധാന ലക്ഷണങ്ങൾ. ഗുരുതരമായാൽ ന്യൂമോണിയ, മസ്തിഷ്കജ്വരം തുടങ്ങിയ സങ്കീർണതകൾ ഉണ്ടാകാമെന്ന് ആരോഗ്യവകുപ്പ് മുന്നറിയിപ്പ് നൽകുന്നു.

കുട്ടികൾക്ക് ആവശ്യമായ പ്രതിരോധ കുത്തിവയ്പ് സമയബന്ധിതമായി ഉറപ്പാക്കുന്നതിലും വാക്സിനേഷൻ സംബന്ധിച്ച ആശങ്കകളും വിമുഖതകളും പരിഹരിക്കുന്നതിലും ആരോഗ്യവകുപ്പിന്റെ ഇടപെടൽ ശക്തമാക്കേണ്ട സാഹചര്യമാണ് നിലവിലുള്ളത്.