കോഴിക്കോട്: മദ്യപിച്ച് അപകടകരമായി വാഹനമോടിച്ചെന്ന കേസില് യൂട്യൂബര് അശ്വന്ത് കോക്കിന്റെ ഡ്രൈവിംഗ് ലൈസന്സ് സസ്പെന്ഡ് ചെയ്യുന്നതിനായി നടക്കാവ് പൊലീസ് മോട്ടോര് വാഹന വകുപ്പിന് റിപ്പോര്ട്ട് നല്കും. എരഞ്ഞിപ്പാലത്ത് വാഹനാപകടമുണ്ടാക്കിയ സംഭവത്തിലാണ് നടപടി. അശ്വന്ത് ഓടിച്ച വാഹനം എരഞ്ഞിപ്പാലത്ത് നിര്ത്തിയിട്ടിരുന്ന കാറിലും തുടര്ന്ന് രണ്ട് ഇരുചക്രവാഹനങ്ങളിലും ഇടിച്ചതായാണ് പരാതി. അപകടത്തിന് പിന്നാലെ നാട്ടുകാര് വാഹനം തടഞ്ഞുനിര്ത്തി പൊലീസിനെ വിവരമറിയിക്കുകയായിരുന്നു. തുടര്ന്ന് നടക്കാവ് പൊലീസ് അശ്വന്തിനെ കസ്റ്റഡിയിലെടുത്തു.
സംഭവത്തില് പൊലീസ് കേസെടുത്തിട്ടുണ്ട്. മനുഷ്യജീവന് അപകടമുണ്ടാക്കുന്ന രീതിയില് വാഹനമോടിച്ചതിനും മദ്യപിച്ച് വാഹനമോടിച്ചതിനുമാണ് കേസെടുത്തതെന്ന് റിപ്പോര്ട്ടുകള് പറയുന്നു. അറസ്റ്റ് രേഖപ്പെടുത്തിയ ശേഷം അശ്വന്തിനെ സ്റ്റേഷന് ജാമ്യത്തില് വിട്ടയച്ചു. കസ്റ്റഡിയിലെടുത്ത വാഹനം പരിശോധിച്ചപ്പോള് എയര്പിസ്റ്റളും പെല്ലറ്റുകളും കണ്ടെത്തിയതായാണ് വിവരം. വാഹനവും എയര്ഗണും പൊലീസ് കോടതിയില് ഹാജരാക്കിയതായും റിപ്പോര്ട്ടുകളുണ്ട്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
അശ്വന്തിന്റെ വാഹനത്തില് മദ്യം കണ്ടെത്തിയതായും ചില റിപ്പോര്ട്ടുകള് പറയുന്നു. വൈദ്യപരിശോധനയ്ക്ക് ശേഷം മാധ്യമപ്രവര്ത്തകര് മദ്യപിച്ചിരുന്നോ എന്ന് ചോദിച്ചപ്പോള്, ”ദിസ് ഈസ് അപ് ടു ദ് ഓഫിസര് ആന്ഡ് നോട്ട് ടു മീ, കേരള പൊലീസ് ഈസ് ഡൂയിങ് ദേര് ഡ്യൂട്ടി” എന്നായിരുന്നു അശ്വന്തിന്റെ പ്രതികരണം. സംഭവത്തിന് പിന്നാലെ നാട്ടുകാരുമായി അശ്വന്ത് തര്ക്കിക്കുന്നതിന്റെ ദൃശ്യങ്ങളും പുറത്തുവന്നിരുന്നു. അപകടവുമായി ബന്ധപ്പെട്ട് വാഹന ഉടമകള് പൊലീസില് പരാതി നല്കിയതായും റിപ്പോര്ട്ടുണ്ട്.
