ന്യൂഡൽഹി: സിന്ധു നദീജല കരാറിൽ ഇന്ത്യയുടെ നിലപാടിൽ മാറ്റമില്ലെന്ന് കേന്ദ്ര വിദേശകാര്യ മന്ത്രാലയം. ഇക്കാര്യത്തിൽ ഇന്ത്യയുടെ നിലപാട് നേരത്തെ തന്നെ വ്യക്തമാക്കിയതാണ്. അതിൽനിന്ന് പിന്നോട്ടില്ലെന്നും വിദേശകാര്യ മന്ത്രാലയ വക്താവ് രൺധീർ ജയ്സ്വാൾ വ്യക്തമാക്കി. ഷാങ്ഹായ് സഹകരണ സംഘടനയുടെ (എസ്സിഒ) സിവിലൈസേഷണൽ ഡയലോഗ് ഫോറത്തിൽ പങ്കെടുക്കാൻ പാക് മന്ത്രി മുസാദിക് മാലിക് ഡൽഹിയിലെത്തിയ പശ്ചാത്തലത്തിലാണ് ഇന്ത്യ നിലപാട് ആവർത്തിച്ചത്.
വെള്ളിയാഴ്ച നടന്ന വിദേശകാര്യ മന്ത്രാലയത്തിന്റെ പതിവ് വാർത്താസമ്മേളനത്തിൽ മാധ്യമപ്രവർത്തകരുടെ ചോദ്യത്തിന് മറുപടി നൽകുകയായിരുന്നു അദ്ദേഹം. സിന്ധു നദീജല കരാറിൽ ഇന്ത്യയുടെ നിലപാട് വളരെ വ്യക്തമാണെന്നും അതിൽ യാതൊരു മാറ്റവുമില്ലെന്നും രൺധീർ ജയ്സ്വാൾ പറഞ്ഞു.
പഹൽഗാം ഭീകരാക്രമണത്തിന് പിന്നാലെ 2025ലാണ് ഇന്ത്യ സിന്ധു നദീജല കരാർ മരവിപ്പിച്ചത്. ഏപ്രിൽ 22ന് നടന്ന ഭീകരാക്രമണത്തിൽ 26 പേരാണ് കൊല്ലപ്പെട്ടത്. പാകിസ്താനെതിരായ നടപടികളുടെ ഭാഗമായിട്ടായിരുന്നു ഇന്ത്യയുടെ തീരുമാനം.
എസ്സിഒ സിവിലൈസേഷണൽ ഡയലോഗ് ഫോറത്തിൽ പങ്കെടുക്കുന്നതിനായി വെള്ളിയാഴ്ച രാവിലെയാണ് പാക് മന്ത്രി മുസാദിക് മാലിക് ഡൽഹിയിലെത്തിയത്. ചരിത്രപ്രസിദ്ധമായ പുരാന ഖിലയിൽ ഇന്ത്യ ആതിഥേയത്വം വഹിക്കുന്ന ത്രിദിന സമ്മേളനം പ്രധാനമന്ത്രി നരേന്ദ്രമോദിയാണ് ഉദ്ഘാടനം ചെയ്തത്. കഴിഞ്ഞ വർഷം മെയ് 7 മുതൽ 10 വരെ നടന്ന ഓപ്പറേഷൻ സിന്ദൂറിനും തുടർന്നുണ്ടായ സൈനിക സംഘർഷങ്ങൾക്കും ശേഷം ഒരു പാക് മന്ത്രിയെ ഇന്ത്യയിലേക്ക് ക്ഷണിക്കുന്നത് അപൂർവമായ സംഭവമായാണ് വിലയിരുത്തപ്പെടുന്നത്.
അതിർത്തി കടന്നുള്ള ഭീകരവാദത്തിൽ മറുപടി പറയാതെ പാക് മന്ത്രി
അതിർത്തി കടന്നുള്ള ഭീകരവാദത്തെക്കുറിച്ചുള്ള ഇന്ത്യയുടെ ആശങ്കകളെക്കുറിച്ച് മാധ്യമപ്രവർത്തകർ ചോദിച്ചപ്പോൾ നേരിട്ട് മറുപടി നൽകാതെ മുസാദിക് മാലിക് ഒഴിഞ്ഞുമാറി. അടുത്ത ദിവസം തന്റെ പ്രസ്താവനയ്ക്ക് ശേഷം കൂടുതൽ കാര്യങ്ങൾ സംസാരിക്കാമെന്നായിരുന്നു പ്രതികരണം.















