തീയറ്റര്‍ നിറയ്ക്കാന്‍ സര്‍വോപരി പാലാക്കാരനടക്കം നാളെ ഏഴു ചിത്രങ്ങള്‍ റിലീസിന്

വെള്ളിയാഴ്ച തിയറ്റര്‍ ഉത്സവമാക്കാനെത്തുന്നത് നാല് മലയാള ചിത്രങ്ങളടക്കം 7 ചിത്രങ്ങള്‍. മലയാളത്തില്‍ നിന്ന് സര്‍വോപരി പാലാക്കാരനും വര്‍ണ്യത്തില്‍ ആശങ്കയും ചങ്ക്‌സും ദ്രാവിഡ പുത്രിയുമാണ് തിയേറ്ററുകളിലേക്കെത്തുന്നത്. ബോളിവുഡില്‍ നിന്നാകട്ടെ പ്രേക്ഷകര്‍ കാത്തിരിക്കുന്ന ഷാരൂഖ് ഖാന് – അനുഷ്‌ക ശര്‍മ ജോഡികളുടെ ജബ് ഹാരി മെറ്റ് സെജാലും. ടോളിവുഡില്‍ നിന്ന് പ്രേക്ഷകരിലേക്കെത്തുന്നത് നക്ഷത്രമാണ്.

വേണുഗോപന്‍ സംവിധാനം ചെയ്യുന്ന സര്‍വോപരി പാലാക്കാരന്‍ ചുംബന സമരമുള്‍പ്പെടെയുള്ള സമകാലീന വിഷയങ്ങള്‍ പ്രതിപാദിക്കുന്നുണ്ട്. അനൂപ് മേനോന്‍, അപര്‍ണ ബാലമുരളി, അനു സിതാര, അലന്‍സിയര്‍, ബാലു വര്‍ഗീസ്, ഗായത്രി അരുണ്‍ തുടങ്ങിയവരാണ് ചിത്രത്തിലെ താരങ്ങള്‍.

സിദ്ധാര്‍ഥ് ശിവ സംവിധാനം ചെയ്യുന്ന ചിത്രമാണ് വര്‍ണ്യത്തില്‍ ആശങ്ക. കുഞ്ചാക്കോ ബോബനാണ് നായകന്‍. സുരാജ് വെഞ്ഞാറമൂട്, ചെമ്പന്‍ വിനോദ്, ഷൈന്‍ ടോം ചാക്കോ എന്നിവരും ചിത്രത്തിലുണ്ട്.

ഹാപ്പി വെഡ്ഡിങ്ങിന് ശേഷം ഒമര്‍ ലുലു സംവിധാനം ചെയ്യുന്ന ചിത്രമാണ് ചങ്ക്‌സ്. ഹണി റോസ്, ധര്‍മജന്‍, ബാലു വര്‍ഗീസ് തുടങ്ങിയവരാണ് പ്രധാന താരങ്ങള്‍. റോയ് തൈക്കാടന്‍ സംവിധാനം ചെയ്യുന്ന ദ്രാവിഡ പുത്രിയും മലയാളത്തില്‍ നിന്നായി തിയേറ്ററിലെത്തുന്നു.

പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന ചിത്രമാണ് ഷാരൂഖ് ഖാന്‍ അനുഷ്‌ക ശര്‍മ്മ ജോഡിയുടെ ജബ് ഹാരി മെറ്റ് സെജാല്‍. ഷാരൂഖ് ഖാന്‍ ടൂറിസ്റ്റ് ഗൈഡായെത്തുന്ന ചിത്രം സംവിധാനം ചെയ്തിരിക്കുന്നത് ഇംതിയാസ് അലിയാണ്. പ്രീതത്തിന്റേതാണ് സംഗീതം. ബോളിവുഡില്‍ നിന്നെത്തുന്ന മറ്റൊരു ചിത്രമാണ് ശങ്കര്‍ രാമനൊരുക്കിയ ക്രൈം ത്രില്ലറയ ഗുര്‍ ഗാവോന്‍. പങ്കജ് ത്രിപദി, അക്ഷയ് ഒബ്‌റോയ്, രാഗിണി ഖന്ന തുടങ്ങിയവരാണ് താരങ്ങള്‍.

Close