പാലക്കാട് : കേരള സ്റ്റേറ്റ് ഷെഡ്യൂൾഡ് കാസ്റ്റ് & ഷെഡ്യൂൾഡ് ട്രൈബ് റസിഡൻഷ്യൽ എജ്യൂക്കേഷൻ സൊസൈറ്റിക്ക് കീഴിലുള്ള പാലക്കാട് മെഡിക്കൽ കോളേജിലെ നിയമനങ്ങൾ പി എസ് സിക്ക് വിടാൻ ശുപാർശ . വിജിലൻസ് സംഘം നടത്തിയ മിന്നൽ പരിശോധനയിൽ ക്രമക്കേടുകൾ ശ്രദ്ധയിൽ പെട്ടതിനെത്തുടർന്നാണ് നിയമനങ്ങൾ പി എസ് സിക്ക് വിടണമെന്ന് അഡീഷണൽ ചീഫ് സെക്രട്ടറി നിർദ്ദേശം നൽകിയത് .
ഇരുന്നൂറോളം ജീവനക്കാരെ നടപടിക്രമങ്ങൾ പാലിക്കാതെ നിയമിച്ചെന്ന യുവമോർച്ചയുടെ പരാതിയെ തുടർന്നാണ് അന്വേഷണം .ഇന്റർവ്യൂ ബോർഡ് രൂപീകരിക്കാതെ സ്പെഷ്യൽ ഓഫീസർ നേരിട്ട് നടത്തിയ നിയമനത്തിനെതിരെയാണ് പരാതി ഉയർന്നത് . പൂർണമായും സർക്കാർ ഫണ്ട് ഉപയോഗിച്ച് പ്രവർത്തിക്കുന്ന സ്ഥാപനങ്ങളിൽ പി എസ് സി വഴി മാത്രമേ നിയമനം നടത്താവൂ എന്നതാണ് ചട്ടം . ഇത് പാലക്കാട് മെഡിക്കൽ കോളേജിൽ ലംഘിക്കപ്പെട്ടുവെന്ന് അന്വേഷണ സംഘം കണ്ടെത്തി .
സർക്കാർ ഡോക്ടർമാരുടെ സംഘടനയായ കെ ജി എം ഒ എ യും മെഡിക്കൽ കോളേജിലെ നിയമനങ്ങളിലെ ക്രമ വിരുദ്ധതയെ ചോദ്യം ചെയ്ത് പരസ്യമായി രംഗത്തെത്തിയിരുന്നു. യാതൊരു മാനദണ്ഡവുമില്ലാതെയാണ് മെഡിക്കൽ കോളേജിൽ ഡോക്ടർമാരുടെ നിയമനങ്ങൾ നടത്തിയതെന്ന് കെ ജി എം ഒ എ ആരോപിച്ചു. ഇതെല്ലാം വ്യക്തമാക്കിക്കൊണ്ടുള്ള ലഘുലേഖയും സംഘടന വിതരണം ചെയ്തിരുന്നു
മെഡിക്കൽ കോളേജിലെ നിയമനങ്ങൾ ഇൻസ്റ്റിറ്റ്യൂട്ട് ഓഫ് മാനേജ്മെന്റ് ഇൻ ഗവണ്മെന്റ് ( IMG ) എന്ന സ്ഥാപനത്തിന്റെ മേൽ നോട്ടത്തിൽ നടത്തിയെന്നാണ് ഷാഫി പറമ്പിൽ എം എൽ എ പറഞ്ഞത് . സർക്കാർ ജീവനക്കാർക്ക് മാനേജ്മെന്റിൽ വിദഗ്ദ്ധ പരിശീലനം നൽകുന്ന ഒരു സ്ഥാപനത്തിന് ഗവൺമെന്റ് മെഡിക്കൽ കോളേജിലെ നിയമനങ്ങൾ എങ്ങനെ നടത്താൻ കഴിയുമെന്ന് ചോദ്യമുയർന്നിരുന്നു . ഇതുവരെ നടത്തിയിട്ടുള്ള ഇരുനൂറോളം നിയമനങ്ങളിൽ വൻ അഴിമതി നടന്നിട്ടുണ്ടെന്ന് ഇതിൽ നിന്നും വ്യക്തമാകുന്നതായും സുതാര്യമായ അന്വേഷണം നടത്തി അഴിമതി പുറത്തുകൊണ്ട് വരണമെന്നും ആവശ്യപ്പെട്ടാണ് യുവമോർച്ച പ്രക്ഷോഭം നടത്തിയത്.
മെഡിക്കൽ കോളേജിലെ നിയമനങ്ങൾ പി എസ് സി ക്ക് വിടാനുള്ള തീരുമാനം യുവമോർച്ചയുടെ സമരത്തിന്റെ ഭാഗികമായ വിജയമാണെന്ന് യുവമോർച്ച പാലക്കാട് ജില്ലാ പ്രസിഡന്റ് പി രാജീവ് , സംസ്ഥാന സെക്രട്ടറി ശരത് കുമാർ എന്നിവർ പത്ര സമ്മേളനത്തിൽ പറഞ്ഞു. . നിയമനങ്ങൾ സുതാര്യമാണെന്ന ഷാഫി പറമ്പിൽ എം എൽ എ യുടെ വാദം പൊളിയുകയാണെന്ന് ചൂണ്ടിക്കാട്ടിയ യുവമോർച്ച ഇതുവരെയുള്ള നിയമനങ്ങളിൽ ഉടൻ സമഗ്ര അന്വേഷണം നടത്തണമെന്നും ആവശ്യപ്പെട്ടു,.
