പെരുമ്പാവൂര്: ബാലമന്ദിരത്തില് അന്തേവാസികളായ കുട്ടികളെ പീഡിപ്പിച്ചുവെന്ന പരാതിയില് സ്ഥാപനത്തിന്റെ ചുമതലക്കാരനായ വൈദികനെ അറസ്റ്റ് ചെയ്തു. പെരുമ്പാവൂര് വളയന്ചിറങ്ങര ബാലഗ്രാം ബാലമന്ദിരത്തിന്റെ ചുമതലക്കാരനായ വൈദികന് പത്തനംതിട്ട നാരങ്ങാനം സ്വദേശി ഫാ. ജോണ് ഫിലിപ്പോസ് ആണ് അറസ്റ്റിലായത്.
പത്താം ക്ലാസില് പഠിച്ചിരുന്ന ഒരു കുട്ടി പഠനത്തില് മോശമായതിനെ തുടര്ന്ന് അദ്ധ്യാപകര് വിവരങ്ങള് തിരക്കിയപ്പോഴാണ് പീഡനവിവരം പുറത്തായത്. 2012 മുതല് പീഡനം നടന്നിരുന്നതായി കുട്ടിയുടെ മൊഴിയില് നിന്ന് വ്യക്തമായിരുന്നു. തുടര്ന്നാണ് പൊലീസില് പരാതി നല്കിയത്.
സ്ഥാപനത്തില് താമസിച്ച് പഠിച്ചുകൊണ്ടിരുന്ന മറ്റ് വിദ്യാര്ഥികളെയും ഇയാള് പീഡിപ്പിച്ചതായി പൊലീസ് പറഞ്ഞു. അഞ്ച് വിദ്യാര്ഥികളാണ് ചൈല്ഡ് ലൈന് പ്രവര്ത്തകര് മുഖേന പൊലീസില് പരാതിപ്പെട്ടത്. പെരുമ്പാവൂര് സിഐ മുഹമ്മദ് റിയാസ്, എസ്ഐ ഹണി കെ. ദാസ് എന്നിവരുടെ നേതൃത്വത്തിലാണ് പൊലീസ് വൈദികനെ അറസ്റ്റ് ചെയ്തത്. പെരുമ്പാവൂര് ഫസ്റ്റ് ക്ലാസ് മജിസ്ട്രേറ്റ് കോടതിയില് ഹാജരാക്കിയ ഇയാളെ റിമാന്ഡ് ചെയ്തു.