ആരാധകരുടെ കാത്തിരിപ്പിന് വിരാമമിട്ട് മോഹൻലാലും പൃഥ്വിരാജും ഒന്നിക്കുന്നു. പൃഥ്വിരാജിന്റെ കന്നി സംവിധാന സംരംഭമായ ലൂസിഫറിൽ മോഹൻലാൽ നായകനാകും. നടൻ മുരളീ ഗോപിയാണ് ചിത്രത്തിന്റെ രചന.
ആരാധകർക്കുള്ള ഓണസമ്മാനമായാണ് ആ പ്രഖ്യാപനം എത്തിയത്. നടനായും ഗായകനായും നിർമ്മാതാവായും കഴിവ് തെളിയിച്ച പ്രിഥ്വിരാജ് ഇനി സംവിധായകന്റെ കുപ്പായം അണിയുന്നു. തന്റെ ഫെയ്സ് ബുക്ക് പേജിലൂടെയാണ് പ്യഥ്വി സംവിധായകനാകുന്ന കാര്യം വെളിപ്പെടുത്തിയത്.
ലൂസിഫറെന്ന് പേരിട്ട ചിത്രത്തിൽ മോഹൻലാലാണ് നായകനാകുന്നത്. നടനും തിരക്കഥാ കൃത്തുമായ മുരളീ ഗോപി രചന നിർവഹിക്കുന്ന ചിത്രം ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കും. ചിത്രത്തിന്റെ പ്രാരംഭ പ്രവർത്തനങ്ങളാണ് തുടങ്ങിയിട്ടുള്ളതെന്നും നല്ല സിനിമകളുടെ പട്ടികയിലേക്ക് ചേർത്ത് വെയ്ക്കാൻ കഴിയുന്ന ചിത്രമായിരിക്കുമെന്ന് പ്യഥ്വിരാജ് പറഞ്ഞു.
സുകുമാരന്റെയും ഭരത് ഗോപിയുടെയും മക്കൾ ഒന്നിക്കുന്ന ചിത്രത്തിൽ പ്രവർത്തിക്കാൻ കഴിയുന്നതിന്റെ സന്തോഷം മോഹൻലാലും ഫെയ്സ് ബുക്കിൽ പങ്കുവെച്ചു. സിനിമയിലെ തന്റെ ഫസ്റ്റ് ലുക്ക് ഫോട്ടോയും പോസ്റ്റ് ചെയ്തിട്ടുണ്ട്.
മോഹൻലാലിനായി എഴുതുകയെന്നത് തന്റെ സ്വപ്നമായിരുന്നതായും തന്റെ സ്വപ്ന പ്രോജക്റ്റാണ് ലൂസിഫറെന്നും മുരളീ ഗോപി പ്രതികരിച്ചു. സിനിമയെ കുറിച്ചുള്ള കൂടുതൽ വിവരങ്ങൾ പുറത്ത് വിട്ടിട്ടില്ല.
എന്നാൽ തെന്നിന്ത്യയിലെയും ബോളിവുഡിലെയും പ്രമുഖർ ലൂസിഫറിൽ അണിനിരക്കുമെന്നാണ് റിപ്പോർട്ട്. ഏറെ പ്രതീക്ഷയോടെ ആരാധകരും കാത്തിരിക്കുകയാണ് ലൂസിഫറിനായി.