ശ്രീനഗർ: അപകടത്തിൽ പെട്ട വാഹനത്തിൽ നിന്നും സൈനികനെ രക്ഷിച്ച് കശ്മീരി യുവാക്കൾ മാതൃകയായി. സൈന്യത്തിനെതിരേ ഒരു സംഘം യുവാക്കൾ കല്ലേറു നടത്തുന്നതിനിടെയാണ് ഈ യുവാക്കളുടെ സേവനം ശ്രദ്ധേയമാകുന്നത്.
കശ്മീരിലെ ശ്രീനഗർ ബൈപാസ് റോഡിൽ ലസ്‌ജൻ ഏരിയായിലെ പാന്ഥ ചൗക്കിലാണ് സൈനികവാഹനം അപകടത്തിൽപ്പെട്ടത്. നിയന്ത്രണം നഷ്ടപ്പെട്ട വാഹനം ഒരു മരത്തിലിടിച്ചു തകരുകയായിരുന്നുവെന്ന് പൊലീസ് പറഞ്ഞു.
അപകടത്തേത്തുടർന്ന് ഛിന്നഭിന്നമായ വാഹനത്തിനുള്ളിൽ ഒരു സൈനികൻ അകപ്പെട്ടു പോവുകയായിരുന്നു. ഉള്ളിൽ കുടുങ്ങിയ സൈനികനെ രക്ഷിക്കാനുള്ള സഹപ്രവർത്തകരുടെ ശ്രമങ്ങൾ വിഫലമായതോടെയാണ് പ്രദേശവാസികളായ കശ്മീരി യുവാക്കൾ സഹായത്തിനെത്തിയത്. വാഹനത്തിൽ ആകെ 12 സൈനികരുണ്ടായിരുന്നു.
രക്ഷാപ്രവർത്തനം നടത്തിയ യുവാക്കൾക്ക് നന്ദിയറിയിച്ചുകൊണ്ട് ഇന്ത്യൻ ആർമിയുടെ നോർത്തേൺ കമാൻഡ് ട്വീറ്റ് ചെയ്തു.
അതുവഴി കടന്നു പോയ ദൃക്സാക്ഷികളിലാരോ പകർത്തിയ രക്ഷാപ്രവർത്തനത്തിന്റെ ചിത്രങ്ങൾ ഇപ്പോൾ സമൂഹമാദ്ധ്യമങ്ങളിൽ വൈറൽ ആയിരിക്കുകയാണ്.
