ഇസ്ലാമാബാദ്: ഭാരതം അഭിമാനപൂർവം ലോകത്തിനു മുന്നിൽ അവതരിപ്പിച്ച യോഗയെ ഔദ്യോഗികമായി സ്വീകരിക്കാൻ ഒരുങ്ങി പാകിസ്താനും. ഇസ്ലാമാബാദിലെ ക്യാപ്പിറ്റൽ ഡെവലപ്മെന്റ് അതോറിറ്റി (CDA ) യാണ് സൗജന്യമായി ക്ലാസുകൾ സംഘടിപ്പിച്ച് യോഗയെ പ്രോത്സാഹിപ്പിക്കാൻ ഒരുങ്ങുന്നത്. ഫേസ്ബുക്ക് പേജിലൂടെയാണ് അതോറിറ്റി ഇക്കാര്യം ഔദ്യോഗികമായി സ്ഥിരീകരിച്ചത്. ഇസ്ലാമാബാദിലെ F -9 പാർക്കിൽ സൗജന്യ യോഗ ക്ലാസുകൾ ആരംഭിച്ചതായി CDA അറിയിച്ചു. നിരവധി ആളുകൾ ഇതിനോടകം തന്നെ ക്ലാസുകളിൽ ചേർന്ന് കഴിഞ്ഞു. പരിശീലനത്തിൽ പങ്കെടുക്കുന്ന ആളുകളുടെ ചിത്രങ്ങളും CDA ഫേസ്ബുക് പേജിലൂടെ പങ്കുവച്ചിരുന്നു.
2014 ഡിസംബർ 11 ന് ഐക്യരാഷ്‌ട്രസഭ ജൂൺ 21 അന്താരാഷ്‌ട്ര യോഗ ദിനമായി പ്രഖ്യാപിച്ചിരുന്നു. അന്താരാഷ്‌ട്ര തലത്തിൽ യോഗയ്‌ക്ക് വലിയ സ്വീകാര്യതയാണുള്ളത്. അന്താരാഷ്‌ട്ര യോഗ ദിനത്തിനായി ഇന്ത്യ കരട്‌ പ്രമേയം അവതരിപ്പിച്ചപ്പോൾ 175 രാജ്യങ്ങളാണ് അതിനെ പിന്തുണച്ചത്. പാകിസ്താനിൽ പൊതുവെ യോഗ പഠിപ്പിക്കുന്നതിനുള്ള സ്ഥാപനങ്ങൾ വളരെ കുറവാണ്. എന്നാൽ പലരും അധികമാരും അറിയാതെ വ്യായാമ മുറയെന്ന രീതിയിൽ യോഗ പരിശീലിക്കുകയും ഇഷ്ടപ്പെടുകയും ചെയ്യുന്നവരാണ്. അതുകൊണ്ട് തന്നെ കാപ്പിറ്റൽ ഡെവലപ്മെന്റ് അതോറിറ്റിയുടെ യോഗ ക്ലാസുകൾ തലസ്ഥാന നഗരവാസികൾ ഇരുകൈയ്യും നീട്ടി സ്വാഗതം ചെയ്യുകയാണ്.
എന്നാൽ കടുത്ത സാമ്പത്തിക പ്രതിസന്ധിയിൽ വലയുന്ന രാജ്യത്തെ ആളുകളുടെ അടിസ്ഥാന സൗകര്യ വികസനം ആദ്യം ഉറപ്പാക്കൂ എന്നും എന്നിട്ടാവാം മറ്റു കാര്യങ്ങൾ എന്നാണ് ചിലരുടെ അഭിപ്രായം.
